El Sporting diz alón al ascensu a Primera

|
Sporting 1-2 Valladolid (10 de xunu del 2018)

El proyeutu de Montes Torrecilla naufraga tamién na vuelta col Valladolid (1-2). L'UP Langreo golia al Náxara (5-0) y va xugar la eliminatoria definitiva pa xubir a Segunda B.

La Primera División va siguir ensin equipos asturianos tres los fracasos del Sporting y Uviéu nesta campaña. El conxuntu roxiblancu, clasificáu pa les eliminatories pol ascensu como cuartu tres dexar escapar l'ascensu direutu nun final espantosu de competición, viose superáu pol Valladolid, quintu, tanto en Zorrilla como n'El Molinón.

Nun campu con un ambiente al nivel de les grandes cites, el Sporting nun foi quien a meter el mieu nel cuerpu a los de Sergio González y, pese a que Santos desperdició una ocasión clara al buscar l'autopase y Rubén García pudiera marcar con un remate forzáu tres una internada del uruguayu pela izquierda, foi'l pichichi de la categoría, Mata, el que golpiaría primero.

El tantu llegó tres una xugada que naz nun corner rasu que provocó una contra del Valladolid na que'l centra'l Kiko Olivas avanzó ensin presión y que finó col balón nes botes del goliador blanquivioleta, que tuvo tiempu pa buscar un derechazu a la escuadra de Mariño. Ocho minutos depués los castellanos sentenciaríen la eliminatoria con un disparu llonxanu, otra vegada ensin oposición, d'Óscar Plano.

Carmona, tres un penalti a Santos, maquillaría la derrota de penalti na segunda metá d'una eliminatoria que dexa al Valladolid como rival del Numancia, que superó en La Romareda al Zaragoza por 1-2 (2-3 nel global), nel crucie definitivu pol ascensu. Mentes, el Sporting de Miguel Montes Torrecilla ha de comenzar a preparar la temporada 2018-2019 en Segunda tres un fracasu na planificación deportiva del salmantín, campaña na que los roxiblancos van ver reducida la so capacidá económica pa la conformación de la plantiya, que, salvo sorpresa, liderará Rubén 'Pipo' Baraja, téunicu con contratu en vigor.

Nino clasifica al Elche

La posible solución del Sporting a esta situación ta bien cerca, na propia casa: el Sporting B. El filial roxiblancu tuvo a un tris d'eliminar al Elche na segunda ronda de les eliminatories pol ascensu a Segunda División A, pero otra vegada Nino aportó al rescate de los d'Elx.

Un gol de Cayarga a menos de quince minutos del final al rematar col pie un balón tres saque d'esquina que se pasió per tol área pequeña, daba una merecida clasificación virtual a los xixoneses pese a que les ocasiones más clares del partíu foran visitantes. Nun tardó en reaicionar Pacheta pa sacar a Nino, responsable de la remontada nel tramu final del partíu d'ida nel Martínez Valero (2-1), que nel 86 engachaba dientro l'área cola zurda un balón cayíu del cielu y salvaba al Elche de la eliminación.

Sory encargaríase nel 94 de sentenciar a un Sporting B volcáu que, pese a la derrota, completa una temporada pa enmarcar. Un gran trabayu'l fechu por José Alberto López nel bancu y una gran fornada de futbolistes que merecen tener un güecu nel primer equipu.

Remontada en Ganzábal

El que sí cumplió foi l'Unión, que metió un ḥorobu al Náxara pa remontar el 2-1 de la ida na vuelta de la segunda eliminatoria pol ascensu a Segunda División B. Tolos goles llegaron na segunda parte tres una primer parte igualada, siendo'l responsable d'abrir la lata un llateral, Dani López, con un zurdazu dende fuera del área nel minutu 58 y un llibre direuto trés minutos depués.

Javi Sánchez, en dos ocasiones, y Pablo Acebal, de penalti, completaríen la goliada del club azulgrana, qu'espera rival pal crucie definitu pa dar el saltu de categoría. El sortéu va celebrase esta tarde na Ciudad del Fútbol de Las Rozas dende les 16.30 hores.

Contador Estadistiques