El Sporting abre en Zorrilla la fase decisiva de la temporada

|
Coles n'El Molinón pa Valladolid reducida

Tres finar cuartu na competición regular, l'equipu xixonés enfréntase al Valladolid na primer eliminatoria pol ascensu a Primera.

Cola importante baxa d'Álex Pérez na defensa al cumplir ciclu tres la incomprensible decisión de Baraja d'allinialu en Córdoba mientres reservaba a otros titulares, con Guitián mancáu y la obligatoriedá de pagar una cantidá cercana a los 50.000 euros al so equipu propietariu (el Valladolid) pa xugar, con Juan Rodríguez con recientes molesties musculares y col colombianu Quintero ensin ritmu de competición, el Sporting preséntase en Zorrilla pa correxir el rumbu y dar el primer pasu del camín llargu pal saltu de categoría. Finalmente va ser el xugador del filial el qu'acompañe a Barba como pareya de centrales nun choque que va comenzar a les 20.30 hores.

Baraja, que dexa en Xixón a Hernán y a Viguera por decisión téunica, tampoco nun va poder contar con Nano Mesa por problemes físicos, pero sí colos sos pegoyos más importantes. Mariño, Santos, Jony y Sergio, que nun viaxó a Córdoba, tán a disposición del téunicu natural de Valladolid pa una cita na que los roxiblancos nun van tar solos.

Un total de 591 persones van viaxar hasta la ciudá del Pisuerga p'animar al Sporting nun momentu nel que yá nun hai llugar pa los fallos. El club punxo a disposición de los aficionaos autocares de baldre que van salir a les 15 hores del aparcamientu de la grada este d'El Molinón.

Pela so parte, Sergio González, téunicu que sustituyó nel bancu del Valladolid a Luis César, tien la baxa importante del ex xugador del Uviéu Míchel, que vio la quinta mariella'l sábadu nel decisivu partíu con Osasuna, amás de los mancaos Luismi, Deivid y Cotán. Mata, pichichi de la categoría con 33 goles (8 de penalti), ye'l principal peligru blanquivioleta.

Na semeya, aficionaos faen filera na tarde del martes pa mercar dalgunes de les 591 entraes que'l Valladolid mandó al Sporting pal partíu.

Contador Estadistiques