"Tres 'País malva' hai un discursu social de xéneru y pola igualdá al traviés de la música tradicional", apunta Ornosa

L'Asociación de Música Tradicional Muyeres estrena n'Avilés, coincidiendo col Día Internacional de la Muyer Trabayadora, l'espectáculu 'País malva' coles entraes escosaes dende hai díes. El productor musical Fernando Ornosa califícalu de "saltu cualitativu" na historia del coleutivu, con novedaes nel terrén instrumental y nel vestuariu.

"Trátase d'una apuesta potente", añade Ornosa, que destaca que "tres 'País malva' hai un discursu social de xéneru y pola igualdá al traviés de la música tradicional". En total, 23 son les muyeres qu'actúen nesti espectáculu "non al usu" que tien como nexu de xunión testos de nueves escritores asturianes, lleides con voz n'off dalgunes veces y en direuto, n'otres.

'País malva' afítase nel trabayu de los etnomusicólogos que, alredor de los años 50 del sieglu pasáu, documentaren la música tradicional asturiana. Asina, Muyeres reinterpreta dalgunes de les grabaciones recoyíes nel nuesu territoriu por espertos como Alan Lomax, Kurt Schlindler, Constantin Brailoiu y Manuel García Matos, testimonios qu'en munchos casos apaecíen venceyaos a la muyer, qu'hasta esi momentu solía quedar relegada a un segundu planu nesti tipu d'estudios.

Los arreglos musicales nuna llinia pegada a la tradición musical marquen esti espectáculu, nel que tamién destaca l'usu d'una indumentaria non tradicional, cola fin de dar más importancia a la pallabra. "'País malva' quier formar la idea d'un país asturianu conformáu por caúna de les 23 muyeres que trabayen nél procedentes de toda Asturies. Quier tiñilu de malva, poniendo en primer planu la reivindicación de les muyeres en temes como la violencia de xéneru u otros aspeutos qu'apaecen, como la discriminación llaboral", señala'l productor musical.

Xira de dos años

La representación de güei, que va celebrase a les 19 hores nel Teatru Palacio Valdés dientro la programación qu'entama'l Conceyu d'Avilés pol Día Internacional de la Muyer Trabayadora, cuenta coles entraes escosaes dende hai díes, pero'l públicu asturianu va contar con otres munches oportunidaes pa presenciar esti espectáculu imprescindible. La intención de Muyeres ye xirar con él mientres dos años, con feches yá zarraes de cara a los próximos meses tanto dientro como fuera del Estáu.