Muyeres abre’l VIII Festival Arcu Atlánticu con una representación especial de ‘País malva’

|
'País malva' de Muyeres

Xixón torna a mirar hacia la mar y la cultura de los pueblos vecinos. Dende esti martes y hasta’l domingu celébrase’l VIII Festival Arcu Atlánticu, dedicáu a la visibilidá de les muyeres, que va inaugurar el coleutivu Muyeres con una representación especial del espectáculu ‘País malva’ cola que zarra la xira que comenzó'l 8-M del 2016.

‘Muyeres (in)VISIBLES’ ye’l nome que lleva esti Arcu Atlánticu, que programa nestos seis díes de festival conciertos, esposiciones, conferencies, alderiques, talleres, espectáculos de danza y teatru, y exhibiciones deportives que tienen como suxetu principal a les muyeres. Cimavilla, El Muelle y la Plaza Mayor van acoyer la mayor parte de les actividaes, a los que se sumen instalaciones como l’Antiguu Institutu, la Escuela de Comerciu o l’Acuariu.

La faceta musical ye la que tien más pesu nesti certame, con delles cites especiales, dalgunes preparaes a costafecha pal mesmu. Ye’l casu de la que se va a encargar d’abrir el certame esta nueche a les 22 hores na Plaza Mayor: la representación fin de xira de ‘País malva’, l’espectáculu col que lleva trunfando Muyeres dende'l 2016 n’escenarios de dientro y fuera d’Asturies y que dende l'añu pasáu tien discu, el quintu de Muyeres Asociación de Música Tradicional.

La cita de Xixón va contar con delles collaboraciones de primer nivel, como les de Marisa Valle Roso, Morgane Le Cuff (Breizh), Vanesa Muela (Castilla), Tanxugueiras (Galicia) y Las Çarandas (Miranda de l Douro). Toes elles, xunto a les componentes de Muyeres, van poner música al discursu pola igualdá de xéneru al traviés de la música tradicional esistente tres ‘País malva’.

Conciertos principales

El miércoles va ser el turnu de La Mal Coiffée, que va permitir sentir l’occitanu n’Asturies; el xueves, de l’asturiana B-Linda; el vienres, d’Anabel Santiago; el sábadu, de L-R cola propuesta ‘Amigues’ na que van participar Valle Roso, Mapi Quintana, Andrea Joglar, Merce Santos, Silvia Quesada, Marga Lorences, Eva Tejedor, y 6 Riales, amás de Prau Llerón con bailles a pie de cai; y el domingu, de la Banda de Música de Xixón. Toos ellos van celebrase na Plaza Mayor a les 22 hores.

Amás, n’otros puntos tamién van celebrase conciertos destacables, como los de Lua Duo (mañana 19 hores, plaza d’El Llavaderu), Mnemusine (xueves 20.30 hores, Antiguu Institutu), Muga (vienres 20.30 hores, Antiguu Institutu), una esbilla de ‘Bestiariu’ (sábadu 13 hores, plaza de La Corrada) o Merce Santos Tríu (domingu 19 hores, plaza de la Casona de Xovellanos), ente otros, a los qu’hai que sumar un homenaxe a les maestres de la tonada asturiana (mañana 20 hores, plaza de la Casona de Xovellanos).

Contador Estadistiques