Trés comparses conformen los Cortexos de Mazcaritos d'Avilés

Van tener presencia per segundu añu nel Antroxu avilesín nuna xornada con carros revistíos y na que se va facer la Puya'l Gochu.

Va ser el domingu cuando Los Cortexos de Mazcaritos, que nel pasáu solíen baxar a Avilés el Llunes d'Antroxu, van percorrer les cais de la villa. La comparsa rural de Miranda, representada por Vezos Astures, va salir del CP Palacio Valdés; la marinera de Sabugo, por Sabia Nueva, de la plaza El Carbayu; y la urbana, por Xaréu d'Ochobre, de Rivero.

Les trés van partir a les 12.30 hores p'axuntase a les 13.40 hores n'El Parche, onde van representar les comedies, y a les 14 hores va entamase cola Puya'l Gochu. Esta recuperación dase gracies al trabayu d'investigación fechu por Vezos Astures y el Coleutivu Abillés Antroxu Tradicional, asina como etnógrafos como Alberto Álvarez Peña, y la memoria d'informantes como Pepe Venancia.

"El Llunes d'Antroxu salía la xente mazcaritada, diben en carros del país, baxaben p'Avilés de Miranda, San Critoba, Valliniello, Villa, Illas, etc. Los carros, diben revistíos, adornaos con fueyes de panoyes de maíz o con rames de llaurela", recoyía Vezos Astures. Cada comparsa tenía unos 10 miembros, qu'agora, décades depués, tornen a percorrer la villa, recuperando asina l'Antroxu tradicional.

Na semeya, El Xiru, El Gruñu, La Xira y El Follosu, personaxes de la comparsa de Miranda, y La Vieya ayeri na Folixada d'Antroxu Tradicional celebrada nel CP Marcelo Gago.