Los Cortexos de Mazcaritos tornen a Avilés esti Antroxu

Dellos coleutivos de la villa recuperen dos comparses acompañaes por un carru revistíu, asina como la Puya'l Gochu.

El Coleutivu Abillés Antroxu Tradicional, Vezos Astures, Xaréu d’Ochobre y l'AFA del Colexu Públicu Marcelo Gago devuelven a Avilés un cortexu de mazcaritos con 14 personxes. "Sólamente dalguna persona nos 90 años con buena memoria, de los que nacieren na década de los años 20 del sieglu pasáu, tendrá la suerte de recordar los cortexos d'allegres mazcaritos colos sos carros revistíos peles cais d'Avilés", espliquen los promotores, qu'esti domingu recuperen esta tradición.

A les 12 hores del domingu van salir d'El Carbayedo, pa facer un percorríu hasta El Parche, La Vieya, El Cornelu, El Follosu, El Gruñu y El Manate, La Ramifela, El Festu, El Fate, El Ponientu, La Blanquinaria, El Xiru y La Xira, y El Tronanteru y La Sona. Xunto a ellos, 3 músicos (gaita, tambor y bombu) que van abrir la comparsa.

"La recreación foi un procesu continuu d'investigación-aición al que se-y foi incorporando datos nuevos de calter hemerográficu, información algamada al traviés d'estudios d'etnografía comparada y testimonios orales", esplicaron. José Rodríguez Valdés (Pepe Venancia), Antonio Berlanga García, Rubén Arias Pérez, Esperanza Fernández del Busto, Francisco Julio Sánchez Hernández, Lorenzo Guardado 'El Salerosu', Emma Campa París, Fernando Wes, Germán González Rubín, José Antonio González González, Pedro Menéndez Seijo y María Josefa Sanz Fuentes foron los informantes.

Amás d'esta comparsa de calter rural, l'Asociación Sabia Nueva de Sabugo incorpórase a esti Antroxu tradicional con otra de calter más urbanu, nel que rescampla L'Atabal, "un mazcaritu qu'apaez recoyíu en fontes hemerográfiques y recuperáu gracies a una copla del Doctor José Villalaín (1878-1939) recoyida por Eduardo Gonzalés Herpers (Yuppo)". Ésta va salir a les 12.30 hores de la plaza d'El Carbayo.

Entrambes van coincidir n'El Parche, onde a les 13.30 hores va entamase la Puya'l Gochu, que se facía hasta l'entamu del sieglu pasáu. "El vieyu Hospital de Caridá (güei Hospital d'Avilés) facía una rifa benéfica al averase la fecha del Antroxu; mercaba dos gochos que sortiaba ente los participantes", rellaten los entamadores, que van facer un homenaxe a Antón El Gallu, "un home especialmente queríu na villa, que se ganó'l respetu y ciñu de tola población avilesina apuxando esti tradicional sortéu antroxeru".

El martes, nel desfile

Los Cortexos de Mazcaritos tamién va tar presentes el martes nel desfile del Antroxu, con salida programada pa les 18.30 hores de la cai José Cueto y final n'El Parche. Van encargase d'abrilu xunto col carru revistíu.

Na semeya, El Cornelu, El Gruñu, El Follosu y La Vieya.