El Xiru protagoniza la Folixada d'Antroxu Tradicional n'Avilés

El personaxe descritu por Pepe Venancia preséntase en sociedá nel CP Marcelo Gago.

El Coleutivu Abillés Antroxu Tradicional y Vezos Astures siguen col so llabor de recuperación del Antroxu Tradicional d'Avilés. Nesta ocasión pon el focu n'El Xiru o Guapu la Chistera, que yá saliera l'añu pasáu colos Cortexos de Mazcaritos.

Ye un galán, ún de los 'personaxes de la lluz' o 'guapos', con ropa bono, la cara tapada y teles o caretes de color blancu. La indumentaria respeta la estética de lo último del sieglu XIX y lo primeros del XX, con ciertos toques costumistes y vencéyase al poder social y económicu.

Según espliquen los promotores de la so recuperación, los guapos "suelen ser los encargaos de cantar, baillar o tocar los instrumentos, xueguen cola ironía, la provocación, la crítica y n'ocasiones la inversión y l'ambigüedá sexual". Amás d'El Xiru, son mazcaritos de lluz de la comparsa avilesina l'alcalde, el guarda, el soldáu, el mélicu, el cura o la madama.

Nel otru llau tán los 'personaxes escuros' o 'feos', como La Vieya, El Cornelu, El Follosu, El Gruñu, El Fate o El Fenu, que "serían los más vieyos y ancestrales. Responden a modelos mui primitivos, utilicen mázcarez zooformes y antropoformes, visten ropa vieyo, pieles d'animal, cuernos, colmillos, fueyes, rames, etc., y lleven esquiles y cencerros que guíen la comparsa. Simbolicen les fuerces de la naturaleza, seres sacros, encarnaciones de animales, y suelen ser revoltosos, asusten y faen ruíu".

Tamién del bron

Como otros munchos mazcaritos del Antroxu Tradicional d'Avilés, el nome d'El Xiru vien del bron, xíriga de los caldereros de Miranda. Esta pallabra vien a significar "elegante, guapu, bellu, agradable, fermosu, correutu, estupendu, bono".

Les descripciones feches pol informante Pepe Venancia n'entrevistes col etnógrafu Alberto Álvarez Peña y con otros miembros d'asociaciones como Vezos Astures y el Coleutivu Abillés permitieron recuperar esti personaxe que vistía con una chistera, un bastón y un xaqué vieyu que pudieren consiguir. Elegante, rescamplaba pola so mázcara blanca d'escayola o cartón con llargos bigotes, ceyes prietes y pómulos colloraos, pero sobre manera pola so chistera, de la que colgaben unes cintes de colores a mou de burlla y provocación popular, yá qu'esti personaxe yera una crítica a l'autoridá y a les clases altes.

Esta mañana va ser presentáu en sociedá a les 12.15 hores na Folixada d'Antroxu Tradicional que se celebra nel CP Marcelo Gago con alumnos del centru y del CP Marcos del Torniello. Va tar acompañáu por La Vieya, El Follosu, El Gruñu y El Cornelu pa facer disfrutar a les escolines y escolinos, qu'a lo llargu de la mañana tán entamando actividaes sobre esta folixa tan de nueso como presentaciones, un taller pa facer mázcares d'El Xiru y xuegos.

Na semeya, La Xira y El Xiru nuna apaición previa.