Trabe edita poemarios firmaos por Mori y Armando Vega

El branu, una de les meyores époques pa disfrutar de la llectura, trainos llibros nuevos de la mano d’Ediciones Trabe. Son dos obres de poesía, ‘Orfandá’ de Marta Mori y ‘Ritanes, ñerbates y otros cantos al pasáu’ d’Armando Vega, ganadora del Nené Losada Rico.

La maestra de Secundaria y vicepresidenta de l’Academia de la Llingua Asturiana presenta 34 poemes “densos, pétreos, milimétricos, conteníos, que son a llevanos del dolor a la redención, del tiempu de la infancia a la madurez y, delles veces, a la rebeldía y la vergoña de siguir andando como si nada, como si’l rayu del dolor y de la muerte nun nos tuviera firío”, apunten dende la editorial. Porque ‘Orfandá’ “ye’l poemariu de la devastación: la que produz la muerte del padre, non por esperada menos doliosa; la devastación que produz la crueldá de l’ausencia; pero sobre manera ye la devastación de saber qu’esa conversación aplazada que delles veces ye la vida nunca nun va dase, nin tan siquier siendo posible que se diera”.

La otra propuesta qu’asoleya la editorial ye’l XII Premiu Nené Losada Rico, correspondiente al añu 2017, ‘Ritanes, ñerbates y otros cantos al pasáu’. Esti poemariu escritu nun asturianu “estráu de dialectalismos orientales bien guapos y naturales” y apegáu a la oralidá “aúne composiciones de distinta factura nes que predomina’l poema curtiu, pero también dangunu de más llargor, correlatu perfechu de la memoria. Porque de memoria falen estos versos, de la memoria caltenida de la infancia perdida, del tiempu pasáu nun mundu que yá nun esiste. El qu’agora escribe yá nun ye’l nenu que foi hai tanto nun mundu rural aseñoriáu de ritanes, ñerbates y otres güelgues que lleguen hasta nós al traviés de la señardá de lo perdío”.