Tomé zárrase na sede de Podemos xunto colos sos candidatos pa esixir el respetu del orde de la llista

Trés hores d’aconceyamientu ente la direición de Podemos y Cova Tomé finaron con un zarru de la candidata xunto con Xune Elipe, Laura Tuero, Jorge Fernández y militantes nel llar de Xixón pa esixir el respetu del orde de la llista salida de primaries. La discordia ta na negativa del partíu d’aceptar la presencia nella de Fernández.

“Dixi que llucharía hasta’l momentu últimu de la prórroga pa que se respetase lo que decidieron los nuesos inscritos y inscrites y voi facelo tamién poniendo’l cuerpu”, apunta Tomé, qu’afirma que “yo soi una persona de principios y faigo lo que lleva décades faciendo’l movimientu obreru n’Asturies, lluchar polo que ye xusto. D’equí saldré cola democracia y los valores de Podemos intautos; hasta entós quedo na sede de Podemos, col teléfonu abiertu 24 hores. Soi una persona que nun tien mieu a defender aquello no que cree y que llucha hasta’l final por ello”.

Una sanción a Fernández ye la razón de la negativa de la direición, representada por Rafael Palacios, coordinador autonómicu interín, a la so presencia na llista. Dende la candidatura de Tomé defenden que, amás de ser inxustificada, nun lu inhabilita pa presentase a les eleiciones.

En concreto l’espediente que finó en sanción, abiertu depués de les primaries de payares ganaes por Tomé y el so equipu, vien “poles opiniones que dio dientro del máximu órganu de direición de Podemos, onde foi la quinta persona más votada va un añu”. La cayida de Fernández supondría, aseguren los afeutaos, l’ascensu d’Ana Taboada, séptima en sofitos y quinta de la llista al ser ésta en ‘cremallera’.

“Les inscrites de Podemos Asturies escoyeron una llista eleutoral pa les eleiciones autonómiques. Si permitimos qu’a los inscritos de Podemos nun se-yos respete y s’alterie la so voluntá ¿cómo vamos a ser creyibles pidiendo respetu pa los asturianos nel Parllamentu? Nun se pue permitir nenguna operación pa modificar les primaries y a sacar de la llista a persones que recibieron l’apoyu de les bases”, afirma Tomé. El llunes ye'l día últimu pa rexistrar la llista eleutoral, plazu que s'abrió ayeri.

Na semeya, Tuero, Elipe, Tomé y Fernández Iglesias, sentaos, llueu del aconceyamientu en compañía de militantes.