“Nunca pasó que’l día enantes de rexistrar les llistes los candidatos de Podemos nun sepan l’orde qu’ocupen”, afirma Tuero

“Tamos esixendo que se respete lo que decidió’l 60 por cientu de los participantes nes primaries de payares, esto ye, que Cova Tomé vaya nel númberu 1 de la llista, Xune Elipe nel 2, Laura Tuero nel 3 y Jorge Fernández nel 4”, reclama la propia Tuero. La edil y vocera municipal en Xixón sospecha que’l silenciu de la direición de Podemos Asturies nesi sen pueda esconder la introducción de persones independientes que modifique esi orde ensin consultar a los órganos del partíu.

“Nunca pasó que’l día enantes de rexistrar les llistes los candidatos de Podemos nun sepan l’orde qu’ocupen. Entrugamos y nun tenemos una confirmación espresa de que vayamos dir onde nos correspuende”, denuncia Tuero, que recuerda que dende’l 2014 a estes altures “yá teníemos el Comité Eleutoral fechu y el Comité de Campaña”. Rafael Palacios, coordinador autonómicu interín, asegurara ayeri en rueda de prensa que la direición de Podemos Asturies diba rexistrar a Tomé como candidata, pero nada nun dixo nada con respeutu al cuerpu de llista más allá de que les persones sancionaes o espedientaes quedaríen fuera.

Un silenciu que la candidatura ganadora de les primeriaes ve esmolecedor. “Mañana ye’l primer día qu’abre’l plazu pa presentar candidatures –hasta’l llunes– y nun tenemos certeza de que se caltenga l’orde de llista que foi votada. El plazu pa coaliciones yá finó y la direición nun diz nada. Tenemos llexítimes sospeches de que tres d’ello pudiera tar la introducción de persones independientes” que modificaría la llista retrasando na mesma a Elipe y Tuero.

“Lo qu’esiximos ye que se diga güei mesmu, ensin falta, cuál ye’l verderu orde de la llista”, apunta la xixonesa, que recuerda a la direición que “tienen que respetar lo que votó la militancia en payares”. “Una modificación”, recuerda, “debería refrendase nuna asamblea ciudadana” al tiempu que calca na posibilidá de que tres una consulta fecha a la Comisión de Garantíes Estatal de Podemos por parte de la direición asturiana del partíu “tea una modificación del orde de la llista al so gustu”.

Un conceyu’l xueves

Esti xueves na sede de Xixón ta previstu un aconceyamientu ente la Tomé y Palacios, momentu nel que posiblemente les persones afeutaes por esti silenciu sepán cuál va ser la llista que se va presentar el 28-M nes trés circunscripciones. La postura, como confirmó ayer mesmu la candidata, ye’l caltenimientu íntegru de la llista salida de les primaries: “Vamos lluchar pa que la llista se respete. Tienen que respetar la voluntá de les militantes que votaron nes primaries”, apuntó, pa rescamplar depués que “hebo un reaición evidente de la militancia contra eses sanciones y eses espulsiones. Ye tiempu yá de trabayar en campaña”.

“Tamos esixendo que se respete lo que decidió’l 60 por cientu de los participantes nes primaries de payares, esto ye, que Cova Tomé vaya nel númberu 1 de la llista, Xune Elipe nel 2, Laura Tuero nel 3 y Jorge Fernández nel 4”, reclama la propia Tuero, que recuerda que “l’espediente abiertu a Fernández nun diz nada de que nun pueda presentase”. “Tien que se respetar, porque nun se formó coalición nin se pasó una modificación de la llista per nengún órganu del partíu”, insiste.

Na imaxe, Tuero nuna intervención nun actu de la candidatura, con Fernández visible nun segundu término xunto col conceyal de Somos Uviéu, Rubén Rosón, otra de les persones espedientaes. Semeya obra d'Alisa González.