Una “escusa de tipu burocráticu” retrasa una selmana la decisión del PSOE sobre la ordenanza d’asturianu d’Avilés

|
Una “escusa de tipu burocráticu” retrasa una selmana la decisión del PSOE sobre la ordenanza d’asturianu d’Avilés

El PSOE d’Avilés va tener que decidir la selmana próxima sobre la ordenanza d’asturianu del conceyu. Somos Avilés y IX volvieron a solicitar por vía d’urxencia la convocatoria de la Comisión de Cultura depués de que nun se votara’l llunes la so propuesta con una “escusa de tipu burocráticu” pa "siguir dilatando l'asuntu".

La xunta del llunes, entamada por pidimientu de les dos formaciones d’izquierda 10 meses depués de la última convocada pola conceyala de Promoción Social y Cultura, Yolanda Alonso, contaba con un únicu puntu nel orde del día: “control y siguimientu del procedimientu d’ellaboración de la Ordenanza Municipal del Usu de la Llingua Asturiana”. La vía d’urxencia, siguiendo una posibilidá que recueye l’artículu 7 del Reglamentu Orgánicu Municipal, foi la única manera atopada por estos grupos municipales pa poder tratar esti asuntu enantes de que fine la llexislatura énte la pasividá amosada al respueto pola edil.

Tolos representantes de los partíos acudieron al conceyu de la Comisión de Promoción Social y Cultural, onde nun se pudo votar sobre llevar a Plenu la propuesta d’ordenanza nueva de Somos Avilés con una “escusa de tipu burócraticu” que, n’opinión del conceyal Xune Elipe, “ye una maniobra pa siguir dilatando esti asuntu”. Poro, ayeri mesmu solicitaron otra vuelta por vía d’urxencia la convocatoria de la comisión pa tratar sobre la situación de la ordenanza “qu’ha de celebrase enantes de cinco díes, esto ye, del martes”.

Cambiu de postura de Ciudadanos

La propuesta Somos Avilés consiste na presentación d’un testu alternativu a la primer ordenanza y la solicitú a a la secretaria municipal por vía d’urxencia la ellaboración d’un informe xurídicu “pa que, si’l PSOE quier, poder llevalu a Plenu y aprobalu enantes de que fine la llexislatura”, avanzaba la selmana pasada Elipe a Asturies.com. Sicasí, sí se faló sobre l’asuntu, amosando los partíos les sos postures.

Ente elles sorprendió la de Ciudadanos, que votara nel 2016 a favor de la ellaboración de la Ordenanza Municipal del Usu de la Llingua Asturiana. Agora señala qu’ha de pensar sobre l’asuntu.

Mientres, Alonso criticó la iniciativa de Somos Avilés, calificándola de “eleutoralista”, lo qu’indignó a Elipe pola so trayeutoria de defensa de los derechos llingüísticos, y presumió de les midíes de promoción entamaes dende’l Conceyu. “Esto ye otra cosa, nun ye promoción. Tratáse de dar derechos a los ciudadanos nel usu del asturianu cola alministración, y obligaciones a l’alministración pa respetar dichos derechos”, afirma’l conceyal.

Intención de pesllar l’espediente

La intención del PSOE ye la de pesllar l’espediente basándose nel informe desfavoratible de los servicios xurídicos del ayuntamientu, discutíu por xuristes espertos en temes llingüísticos. Pa ello debería llevar esta cuestión a votación a Plenu, al tratase la ellaboración de la ordenanza d’un mandáu del propiu Plenu.

“Ye’l momentu de blindar derechos, polo que pudiere venir”, añade Elipe, qu’apunta que “vamos ser testerones nesti asuntu y lluchar pola ordenanza hasta’l final”.

Contador Estadistiques