Somos Avilés consigue llevar a Plenu la ordenanza d'asturianu

|
Mariví Monteserín

La candidatura de xunidá popular nun espera que'l PSOE camude la posición contraria amosada na Comisión de Cultura.

A pesar de la negativa de la conceyala Yolanda Alonso y de l'alcaldesa Mariví Monteserín pa qu'esti puntu formara parte del orde del día, el PSOE d'Avilés va tener qu'argumentar mañana en Plenu el motivu de la so oposición a la Ordenanza Municipal pal Usu de la Llingua Asturiana nel Conceyu d’Avilés. Hai agora xusto 3 años los socialistes sofitaren la moción de Somos Avilés de redaición d'esti documentu.

El martes, na Comisión de Promoción Social y Cultura, a la que nun acudió Ciudadanos, tratóse otra vuelta el “control y siguimientu del procedimientu d’ellaboración de la Ordenanza Municipal del Usu de la Llingua Asturiana” y nesta ocasión sí se pudo votar. Na anterior, forciada tamién por Somos Avilés gracies al apoyu d'Izquierda Xunida, Alonso escudóse "nuna escusa de tipu burócraticu", según esplicó l'edil Xune Elipe, pa evitar que se votara que se llevara a Plenu.

Somos Avilés, IX y Ganemos apoyaron el testu nuevu modificáu y rebaxáu p'adaptase a les sentencies xudiciales del Tribunal Superior de Xusticia d'Asturies (TSXA), que tuvo la negativa del PSOE, el PP y conceyales non adscritos. La escusa dada agora por Alonso foi que "deseaba un testu de máximos, dalgo que nun s'entiende cuando refugaron l'anterior, que yera muncho más ambiciosu, pol informe desfavoratible de los servicios xurídicos municipales", que xuristes consultaos por Asturies.com señalaron que nun tuvo en cuenta'l marcu llegal asturianu, como la Llei d'Usu y Promoción del Bable/Asturianu.

Esta situación llevó a la candidatura de xunidá popular a presentar un escritu a la secretaria municipal el día siguiente, miércoles, que-y dio la razón y obligó a incorporar al orde del día del Plenu ordinariu de mañana la votación de la ordenanza. "Ye una victoria amarga, porque nun contamos con que salga alantra", espresa Elipe, que recuerda qu'esta situación "demuestra la indefensión llegal que supón que l'asturianu nun sía llingua oficial".

Na semeya, l'alcaldesa Monteserín. Semeya propiedá del Conceyu d'Avilés.

Contador Estadistiques