Avilés tendrá unes ordenances d'usu del asturianu

El Plenu del Conceyu d'Avilés aprobó la moción presentada por Somos Avilés pa facer unes ordenances d'usu del asturianu. Tolos grupos municipales votaron a favor a esceición del Partido Popular (PP), que se posicionó en contra.

El PSOE, Somos Avilés, Izquierda Xunida (IX), Ciudadanos y Ganemos sofitaron esta mañana esta iniciativa que va permitir regular l'usu del asturianu nel conceyu y el so tratamientu institucional. La votación, poro, foi de 19 votos a favor por 6 en contra, una mayoría bien amplia que namái nun sofita'l PP, fiel a la so posición actual de torgar cualquier avance na normalización del idioma.

En concreto, la moción de Somos Avilés pretendía "iniciar el procedimientu pa l’aprobación d’una Ordenanza Municipal pal Usu de la Llingua Asturiana nel Conceyu d’Avilés, de desarrollu progresivu y adaptada a la realidá sociollingüística propia". La mesma incluyía una esposición de motivos, onde recordaba que'l conceyu "tien cola llingua asturiana una rellación fonda y intensa dende hai bien de tiempu, que na historia asítianos nel sieglu XI cuando’l rei lleonés Alfonso VI firma’l 'Fueru d’Avilés', una especie de 'constitución' propia, redactada nel incipiente romance d’esta tierra que, según los estudios filolóxicos, ye’l primer testu conocíu en llingua asturiana".

Darréu fai un repás a la relllación d'autores llocales destacaos qu'empleguen l'asturianu, asina como de los pasos daos na normalización fechos n'Avilés y l'usu del idioma que realiza l'Ayuntamientu cola so ciudadanía, destacando que "foi'l primeru de toa Asturies n’aceptar a trámite un proyectu arquitectónicu redactáu n’asturianu nel añu 1988", ensin escaecer el llabor que desendolca la Estaya de la Llingua, "sección municipal que sería la encargada de la supervisisión y aplicación efectiva d’esta ordenanza, con llabores de traducción, corrección llingüística y asesoramientu".

Cercanía cola Selmana de les Lletres Asturianes

Somos Avilés destaca que la presentación de la moción en feches cercanes a la celebración de la Selmana de les Lletres (del 2 al 8 de mayu) pensóse "pa valir como apoyu y conmemoración d’esa perimportante efeméride por parte del Conceyu d’Avilés. Creyemos que la relevancia simbólica que tendría la so aprobación na que ye la tercer ciudá d’Asturies representaría ente la ciudadanía una muestra de la querencia y apreciu pola so llingua propia, seya ésta por nacencia o adopción. Búscase tamién axuntar el nome d’Avilés al d’otros conceyos que yá cuenten con normatives llegales asemeyaes n’Asturies y nes comunidaes autónomes nes que s’usa otru idioma amás del castellanu".