Sindicatos y Alcoa lleguen a un alcuerdu pa vender les plantes a Parter

Tres una xornada llarga de negociaciones, los representantes de los trabayadores d’Alcoa n’Avilés y A Coruña y de la multinacional gallega llegaron a un alcuerdu pa la venta de les dos plantes a Parter. El fondu d'inversión suizu tien hasta’l día 31 pa garantizar la so capacidá financiera p’afrontar la compra.

Esa fecha foi hasta cuando estendió la empresa la execución del Espediente de Regulación d’Emplegu que negociara en febreru colos sindicatos hasta’l 30 de xunu pa dar tiempu a la busca d’un comprador pa la planta asturiana y gallega. Parter posicionóse p’Alcoa en xunu como’l so favoritu pa llevar alantre la operación, mientres que l’alemana Quantum yera la preferida polos trabayadores, anque los sos representantes dieron finalmente la so conformidá al procesu depués d’hores de negociación.

La falta de tresparencia por parte d’Alcoa y Parter, que pautaron les condiciones ensin contar colos emplegaos, provocó la indignación d’éstos y el so refugu primeru al alcuerdu. El fondu d’inversión suizu tien agora hasta’l día 31 pa garantizar la so capacidá financiera p’afrontar una operación qu’asegura’l caltenimientu del trabayu pa 2 años, momentu nel que la continuidá de l’actividá nes dos plantes será revisada según el costu de la enerxía nesi momentu.

Los sindicatos van informar esta tarde n'asamblea a los trabayadores de los detalles de la reunión d’ayeri en Madrid con Alcoa.

Na semeya, una imaxe de xineru de los emplegaos d'Alcoa d'Avilés defendiendo los sos puestos de trabayu.