Los trabayadores d'Alcoa salven los sos emplegos hasta l'añu 2021

|
Manifestación trabayadores d'Alcoa en marzu Recintu Ferial Luis Adaro

La multinacional zarra la venta de les factoríes d'Avilés y A Coruña al fondu suizu Parter.

L'interesáu nestes dos plantes apuró los plazos hasta'l final y nun presentó les garantíes financieres esixíes por Alcoa hasta día últimu. Ayeri, 31 de xuneru, roblábase finalmente l'alcuerdu que convierte a Alcoa n'Avilés n'Alu Iberia AVL y que permite a los 312 trabayadores y a los sos compañeros gallegos caltener el so emplegu mientres al menos dos años.

Nesta fecha, nel 2021, Parter Capital Gropu va revisar la situación de les factoríes, teniendo mui en cuenta'l costu de la lletricidá nesi momentu pa siguir cola actividá. Esti condicionante ye'l que más esmolez a a los trabayadores, que se posicionaron nun primer momentu pola otra ufierta recibida por Alcoa, la de l'alemana Quantum.

Fin a nueve meses d'incertidume

Alcoa, que se fixo nel 1997 cola fábrica asturiana d'aluminiu, hasta'l momentu pública, anunciara n'ochobre la so decisión de pesllar les factoríes d'Avilés y d'A Coruña, dexando activa namái la tamién gallega de San Cibrao. La presión de la sociedá y l'esfuerciu de los trabayadores na defensa de los sos emplegos provocó la reconsideración de la multinacional estauxunidense, qu'en xineru alcordaba dar un plazu p'atopar un comprador pa les marques enantes d'executar l'Espediente de Regulación d'Emplegu (ERE), procesu que finó ayeri cola venta a Parter.

Na semeya, manifestación de los trabayadores d'Alcoa frente al Recintu Ferial Luis Adaro, nuna de les munches protestes entamaes mientres estos nueve meses, con motivu de la visita del presidente del Gobiernu estatal Pedro Sánchez a Xixón pa participar nun mitín del PSOE.

Contador Estadistiques