La marcha de los trabayadores d’Alcoa algama la so meta

|
Llegada trabayadores Alcoa a Madrid.png

Col sofitu de 300 desplazaos dende Asturies y decenes de ciudadanos, los trabayadores d’Alcoa entraron en Madrid depués de 13 díes de marcha a pie pa defender los sos emplegos y la industria asturiana. El martes van aconceyar con Parter, l'inversor escoyíu.

Al meudía taben toos convocaos na Castellana, al altor del Santiago Bernabéu, p’avanzar conxuntamente hasta la sede del Ministeriu d’Industria, Comerciu y Turismu nuna manifestción. Una gran amuesa de solidaridá qu’emocionó a los trabayadores d’Alcoa en busca d’una solución pal so futuru, qu'ha de decidise enantes del 1 de xunetu según la fecha marcada pola empresa productora d'aluminiu.

Ésti, de momentu, pasa pol grupu inversor suizu Parter, que quier invertir na planta d’Avilés y tamién na d’A Coruña, les dos afeutaes pola decisión de la multinacional estauxunidense, anque los asturianos amosaron la so preferencia pola de l’alemana Quantum. La opción escoyida garantiza’l trabayu hasta dos años, momentu nel que revisará la situación según el costu enérxeticu del momentu.

“Gobiernu traidor, Alcoa solución” foi’l glayíu más repetíu peles cais de Madrid y frente al ministeriu. Finalmente, los trabayadores algamaron el compromisu de la celebración mañana, a les 11 hores, d’una reunión xunto con representantes del Executivu estatal, Alcoa y Parter nel que van poder conocer de primer mano les intenciones de los suizos.

Contador Estadistiques