Siguen les cifres altes de contaxos: 48 esti martes

La Conseyería de Salú anuncia un casu de COVID-19 nuna residencia de Colombres.

Les cifres últimes de la crisis sanitaria n'Asturies dexaron a 48 persones afeutaes pol coronavirus SARS-CoV-2, 5 menos que'l día anterior. Asina lo comunicó Mario Margolles, coordinador del Observatoriu de la Salú na intervención d'esta mañana xunto con Rafael Cofiño, direutor xeneral de Salú Pública, pa informar sobre la declaración d'alarma naranxa por COVID-19 en Ribeseya, Llanes, Parres, Cangues d’Onís y Cabrales.

Apuntó que dende'l 1 de xunetu la Conseyería de Salú detectó 719 casos, "624 d'ellos namái nel mes d'agostu", y dio a conocer un casu nuevu nuna residencia, nel conceyu de Ribadeva,  la Ulpiano Cuervo, que ta anguaño pesllada. Sicasí, especificó que les carauterístiques epidemiolóxica de los positivos ye mui diferente a la de marzu, con una edá media de 39 años anguaño pola de 62 de los afeutaos nos meses más agresivos de la pandemia.

Una persona más en planta

Con respeuto a los datos comunicaos por Salú coles cifres d'ayeri destaca l'ingresu en planta d'una persona, que pon el total en 10 pacientes. Na UCI, mentes, caltiénense 2 con COVID-19.

Na semeya, Margolles y Cofiño.