Salú declara l’alerta naranxa por COVID-19 en cinco conceyos del oriente

L’aumentu de la incidencia de la COVID-19 nel oriente del país lleva a la Conseyería de Salú a declarar l’alerta naranxa en cinco conceyos de la zona. Esta midida, qu’afeuta a Ribeseya, Llanes, Parres, Cangues d’Onís y Cabrales, pretende ser “una llamada d’atención” enantes de pasar a aiciones más drástiques como'l confinamientu.

Rafael Cofiño, direutor xeneral de Salú Pública, y Mario Margolles, coordinador del Observatoriu de la Salú, salieron esta mañana a informar de la situación, con cuatro biltos detectaos anguaño na área sanitaria VI, la del oriente, llocalizaos en Cabrales, Parres, Ribeseya y Llanes, ésti últimu con incidencia tamién en Caravia, que provocaron al empar otros microblitos. “La mayoría de los casos na área VI tán venceyaos a brotos asociaos a actividaes públiques o llaborales: restoranes, chigres, hoteles, supermercaos, queseríes, sidreríes, actividaes de piragüismu, campings, terraces, escueles de surf, etc.”, apuntó Margolles, que rellató que la esposición al virus nel oriente ye en rede, lo que dificulta’l so control al igual que la importante movilidá esistente.

Dada la situación, la Conseyería de Salú alcordó decretar l’alerta naranxa pa estos cinco conceyos, una figura que nun supón nenguna restricción mayor pa la población, sinón que pretende ser “una llamada d’atención pa facer unes midíes de vixilancia, de control y detección, torgando’l pasar a otros midíes más drástiques como zarros perimetrales o confinamientos”, esplicó Cofiño. Asina, el Gobiernu busca que la tresmisión del coronavirus SARS-CoV-2 nun se desplace a coleutivos más vulnerables y que’l cursu escolar pueda empezar cola mayor seguridá posible.

Cola entrada n’alerta naranxa, poro, van intensificase les actuaciones que se tán faciendo, pero d’una manera “más estricta y controlada”, y va incrementase la información a la población del llugar y a los munchos turistes que visiten la zona “sobre la importancia de ser rigurosos coles midíes de proteición y prevención”, amás de vixilar les xuntes de más de 10 persones y l’encamientu a los ayuntamientos de la revisión de lo que Cofiño llamó ‘puntos calientes’. Una comisión de siguimientu va dir aconceyando nes selmanes siguientes coles autoridaes municipales, de Salú y Vixilancia Epidemiolóxica pa dir revisando la situación “y valorar si tenemos que pasar a midíes más drástiques”, insistió.

Na semeya, Sotres, una de les poblaciones más turístiques de Cabrales.