Asturies, con 53 casos nuevos, rexistra les peores cifres de la segunda fola de COVID-19

El biltu de la residencia xixonesa de Montevil dexa 4 positivos, 3 internos y 1 trabayador.

Los datos de la COVID-19 n'Asturies dexaron ayeri 53 casos nuevos, la cifra más alta de la 'normalidá nueva'. Una cantidá que, magar el país sigue siendo'l territoriu del Estáu "que meyor situación epidemiolóxica tien", esmolez a Adrián Barbón, que llama a "siguir reforzando les midíes, ser rigurosos nel cumplimientu, y pa ello debo calcar na responsabilidá individual. Recordái, toos dependemos de toos", aseguró'l presidente al comunicar les cifres. 

De los 53 positivos por coronavirus SARS-CoV-2 d'ayeri, 13 son contautos estrechos de casos conocíos y 2 pertenecen al biltu del Centro Gerontológico Montevil, que suma un total de 4 dende'l domingu. El Serviciu de Vixilancia Epidemiolóxica ta estudiando el venceyu epidemiolóxicu del restu de los contaxos, toos con sintomatoloxía leve y aisllaos nos sos domicilios, cola esceición d'una persona que tuvo que ser ingresada.