Baxen los contaxos esta fin de selmana

La nota negativa foron los 24 finaos nunes xornaes nes que tamién medró'l númberu de pacientes hospitalizaos con COVID-19.

La Conseyería de Salú comunicó esta fin de selmana la detección de 6.374 casos nuevos: 2.883 el vienres, 1.827 el sábadu y 1.664 ayeri. Ye una cantidá menor a l'anterior, cuando s'informó de 8.749.

Una revisión de los datos rebaxó los 142.790 positivos confirmaos hasta'l domingu 16 a 142.117. Poro, el total de contaxos d'esta selmana queda en 17.763, lo que significa 2.538 positivos diarios de media polos 3.143 de la selmana previa.

Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355 y 3.143, hasta los 2.538 actuales.

Aumenten les muertes

Estos trés díes rexistráronse una cantidá alta de muertes en comparanza con xornaes previes. En total foron 24, 10 el vienres (8 homes de 94, 93, 93, 91, 79, 71, 67 y 64 años, y 2 muyeres de 87 y 83), 8 tamién el sábadu (4 muyeres de 100, 94, 83 y 67, y 4 homes de 86, 85, 82 y 51), y 6 ayeri (5 muyeres de 91, 90, 80, 74 y 41, y 1 home de 96), que sumen no que va d'andanciu 2.261 llueu d'una revisión de datos.

Hai 472 persones ingresaes nos hospitales con COVID-19 polos 428 del xueves. D'ellos, 420 tán en planta, 44 más, mentes que na UCI caltiénse la ocupación, con 52 pacientes.

La total por esta patoloxía ye del 13,50 por cientu y del 16,93, de manera respeutiva.

Na semeya, Autocovid instaláu en Llaranes, nel aparcamientu del Muro de Zaro.