Salú comunica 280 contaxos de COVID-19

La tasa de positividá diaria sigue nun 7 por cientu. Finaron 7 persones esti martes.

A falta de la espublización de los datos oficiales de la COVID-19, la Conseyería de Salú comunicó la detección de 280 positivos ayeri –l'actualización suma 12 casos de díes previos non contabilizaos hasta los 292, dexando'l total del andanciu en 40.455–. Son 47 más de los qu'informó'l día anterior, con 5.802 pruebes de diagnósticu d'infeición activa poles 5.338 de llunes, lo que punxo la tasa de positividá nun 6,95 y un 6,76 por cientu, de manera respeutiva.

A 7 díes, esti porcentaxe yera'l llunes del 8,73 por cientu –l'actualización déxala nun 8,42 por cientu–, entovía lloñe del 5 por cientu que marca la Organización Mundial de la Salú (OMS) como llende pa tener controlada la pandemia. Sicasí la tendencia ye de descensu, yá qu'una selmana enantes taba nun 10,54 por cientu.

Na xornada perdieron la vida 7 persones cola enfermedá causada pol coronavirus SARS-CoV-2: cuatro homes de 85, 83, 81 y 57 años y trés muyeres de 95, 82 y 66, de los que dos vivíen en residencies de mayores. Dende qu'entamó l'andanciu rexistróse un total de 1.622 muertes.

Hai 572 hospitalizaos con confirmación o sospecha de COVID-19, 9 menos que'l llunes. Mentes, na UCI tán ingresaos 123 pacientes, 1 más que'l día anterior.

Ayer, con restricciones más dures

Cola salida mañana de Llanes de nivel d'alerta 4+, van quedar 18 conceyos en riesgu estremu. Son Grau, Uviéu, Cangas del Narcea, Gozón, Noreña, Xixón, Mieres, Samartín del Rei Aurelio, Salas, Valdés, Siero, Carreño y Llaviana, amás d'Avilés, Corvera, Castrillón y Ḷḷena, con restricciones más dures que s'activen tamién güei n'Ayer.

Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, Caborana, col Pozu Santiago a la izquierda. Semeya obra de José Luis Martínez Alvarez baxo llicencia CC BY-SA 2.0.