Segunda xornada con 118 casos de COVID-19

La tasa de positividá diaria quedó nun 4,84 por cientu. Les residencies de mayores acumulen 40 díes ensin biltos.

A falta de la espublización de los datos oficiales de la COVID-19, la Conseyería de Salú informó de la detección ayeri de 118 contaxos –finalmente foron 117 por un duplicáu de díes anteriores–, mesma cantidá que'l llunes tres incorporar na actualización un casu más non contabilizáu en xornaes previes. La tasa de positividá asítiase nun 4,84 por cientu tres la realización de 3.410 pruebes de diagnósticu d'infeición activa, cuando'l porcentaxe anterior foi del 4,74 por cientu al prauticase 3.586 tests, momentu nel qu'a 7 díes taba nun 5,12 por cientu –ayeri xubió a 5,21 por cientu–.

Cuatro persones finaron cola enfermedá causada pol coronavirus SARS-CoV-2: trés homes de 87, 75 y 46 años y una muyer de 86. Súmense yá 1.877 muertos –súmase una perda más non contabilizada de díes previos– dende qu'entamó l'andanciu.

Hai 195 pacientes hospitalizaos con confirmación o sospecha de COVID-19, a los qu'hai que sumar 73 que tán na UCI. Son 19 y 1 menos que'l llunes.

Apertura de Piloña y Cangues d'Onís

Güei recuperaron la movilidá y tornaron a les restricciones comunes al país Piloña y Cangues d'Onís. D'esta forma queda Siero como conceyu únicu en nivel d'alerta 4+.

Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Efeutos de la vacunación

Salú nun detectó nes residencias de persones mayores biltos de coronavirus, lo qu'implica más de trés casos, per quinta selmana siguida. En concreto, acumúlense 40 díes ensin brotos.

Del 16 al 22 de marzu rexistráronse 4 positivos nos 270 centros qu'esisten n'Asturies, onde toles persones que quixeron recibieron la vacuna, asina como 7 finaos con PCR positiva con domiciliu nellos cuando nel periodu anterior morrieron 8.

Na semeya, Cangues d'Onís.