Los contaxos tornen a xubir el llunes: 117 casos

La tasa de positividá diaria queda nun 4,74 por cientu. Piloña y Cangues d'Onís salen del riesgu estremu y recuperen la movilidá esti miércoles.

A falta de la espublización de los datos oficiales de la COVID-19, la Conseyería de Salú comunicó ayeri 117 casos –l'actualización suma 1 más hasta 118–. Son 56 más que'l domingu, cuando se rexistraron 61, la cifra más baxa de positivos de tol 2021.

El Serviciu de Salú del Principáu d'Asturies (SESPA) fxo'l llunes 3.586 pruebes de diagnósticu d'infeición activa, polo que la tasa de positividá s'asitia nel 4,74 por cientu, práuticamente idéntica a la del día anterior, cuando foi del 4,75 por cientu. A 7 díes, el porcentaxe nesa xornada quedó nun 5,16 por cientu –ayeri baxó a 5,12 por cientu–.

Hai que llamentar la muerte d'un home de 60 años, la 1.872 –súmase ún fináu non contabilizáu de díes previos– dende qu'entamó l'andanciu. No que respeuta a la hospitalización, son 214 los pacientes ingresaos con confirmación o sospecha de COVID-19 y 74 los que permanecen na UCI, 11 y 7 menos que'l domingu.

Siero, únicu conceyu atrancáu

L'ameyoramientu de la so situación epidemiolóxica permite a Piloña y Cangues d'Onís salir del riesgu estremu, que llevaben nél dende'l 24 de febreru y el 10 de marzu, de manera respeutiva. Mañana van llevantar el zarru perimetral y los chigres van poder trabayar otra vuelta los sos interiores.

D'esta forma Siero queda como l'únicu conceyu en nivel d'alerta 4+. Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, Piloña.