Santori presenta 'La lluz heredada' na Casa del Libro de Xixón

|
Cubierta 'La lluz heredada' de Xuan Santori

Trabe ye la editorial del mes nesta llibrería.

'La lluz heredada' ye una obra de Xuan Santori asoleyada nel 2018 que xunta dos trabayos independientes previos del autor: 'La heredá' (2005) y 'La fábrica de lluz' (2008), reconocíos dambos colos Premios de la Crítica de l'Asociación d'Escritores d'Asturies. Amás incorpora collaboraciones en prensa y n'otres espublizaciones nuna cuidada edición al decatase autor y editorial de que los dos llibros son un retratu de la vida.

"Nestos rellatos, sobre testimonios reales, l’autor anda pel camín que va de lo individual a lo colectivo, del pasáu al presente; y ye que la materia de la que tán fechos nun ye otro que l’exemplu éticu de comportamientos individuales que moldeen la nuestra conciencia sentimental, social y histórica", apunten dende la editorial. Pero 'La lluz heredada' nun inclúi namái rellatos, yá que'l llector tamién va atopar minientrevistes y poemes.

La presentación d'esti trabayu va tener llugar mañana, a les 19.30 hores, na Casa del Libro, actu nel que va tar tamién presente la copropietaria de Trabe, Esther Prieto. La llibrería xixonesa ta dedicando esti mes a la editorial uvieína, tando previstu tamién, pal día 28 a les 19 hores, un alcuentru col escritor Ovidio Parades.

Contador Estadistiques