Sánchez garra la presidencia del Gobiernu estatal tres salir alantre la moción de censura

Pedro Sánchez convirtióse esti vienres nel sétimu presidente de la Democracia. La moción de censura al Gobiernu de Mariano Rajoy salió alantre gracies al apoyu de Xuníos Podemos y los nacionalistes, cola oposición del PP, Foro, UPN y Ciudadanos.

Tal como confirmara ayeri’l voceru d’EAJ-PNV, Aitor Esteban, los vascos, que veníen de sofitar los Presupuestos Xenerales del Estáu tres llegar a un alcurdu col PP, decidieron sofitar a Sánchez na moción de censura, la cuarta en Democracia y la primera que sal alantre. Los votos de los cinco diputaos de los nacionalistes yeren básicos pa superar la barrera de 176 parllamentarios necesaries pa la so aprobación y la promesa de respetar les cuentes fixo qu’apoyaren al socialista.

D’esta forma, el PSOE, Xuníos Podemos-En Comú-En Marea, Compromís, ERC, CDC (PDeCAT), EAJ-PNV, EH Bildu y Nueva Canarias votaron a favor de la mesma, sumando un total de 180 diputaos. La parllamentaria de Coalición Canaria-Partido Nacionalista Canario astúvose y los 169 del PP, Foro, UPN y Ciudadanos posicionáronse en contra.

Agora Sánchez, que va tomar posesión mañana como presidente, va tener que formar gobiernu, un executivu que va respetar los presupuestos aprobaos recién nel Congresu y pendientes entovía de pasar pel Senáu, onde’l PP tien mayoría absoluta. El madrilanu conviértese, tres Felipe González y José Luis Rodríguez Zapatero, nel tercer miembru del PSOE n’algamar el cargu y el primeru en Democracia en llegar a él ensin ser diputáu.

La dulda agora queda en si’l socialista va convocar eleiciones y cuándo. Mientres l’alderique afirmó que la so intención yera nun agotar la llexislatura.