Rajoy dexa la política

L’hasta’l vienres presidente del Gobiernu estatal, Mariano Rajoy, anunció esti martes qu’abandona la presidencia del Partido Popular (PP) y que se retira de la política. Va siguir nel cargu hasta’l congresu estraordinariu que va convocar pa enantes del fin del branu.

Rajoy dio esta anuncia énte’l Comité Ejecutivo Nacional del PP celebráu esta mañana. “Ye’l momentu de poner puntu y final”, afirmó’l gallegu, con 37 años en política, 14 d’ellos presidiendo la formación popular tres ser designáu por José María Aznar.

La intención del ex presidente del Executivu estatal, que’l vienres dexaba’l cargu tres salir alantre una moción de censura presentada pol PSOE con Pedro Sánchez como alternativa tres la sentencia de la Gürtel, ye convocar agora un congresu estraordinariu del que saldrá’l próximu presidente del PP. La persona que salga escoyida encargaráse de liderar la renovación del partíu chiscáu pola corrupción.