El 25,81 por cientu de la población del país yá tien la pauta completa

Un 45,89 por cientu recibió una dosis. Esti martes rexistráronse 67 contaxos y nenguna muerte con COVID-19 per tercer día.

Los datos últimos de la Conseyería de Salú afita qu'un 25,81 por cientu asturianes y asturianos tien la pauta completa de la vacuna, que nel casu de la población diana, la mayor de 16 años, algama'l 29,17 por cientu. Son un total de 262.912 persones.

Mentes, el Serviciu de Salú del Principáu d'Asturies (SESPA) punxo un total de 467.496 dosis. Asina, un 45,89 de la población tien polo menos la primer vacuna, que nel casu de les persones integraes nel plan de vacunación ye del 51,87 por cientu.

Hasta'l momentu 11.664 persones refugaron vacunase.

Tasa de positividá diaria del 3,37 por cientu

A falta de la espublización de los datos oficiales de la pandemia de COVID-19, Salú informó de la detección de 67 casos nuevos ayeri –l'actualización suma 2 más por positivos non contabilizaos en díes anteriores–. Son 32 más que'l llunes, cuando hebo 35, la segunda cifra menor del añu.

Fixéronse 2.761 pruebes de diagnósticu d'infeición activa, polo que la tasa de positividá s'asitió nel 3,37 por cientu, superior tamién a la de la xornada anterior, cuando hebo un 2,35 por cientu con 2.003 tests fechos. A 7 díes, esti porcentaxe taba enantes de l'actualización nun 3,09 por cientu –ayeri xubió al 3,24 por cientu–.

Engánchense trés xornaes nes que nun hebo que llamentar muerte nenguna cola enfermedá causada pol coronavirus SARS-CoV-2. El total de finaos dende qu'entamó la andanciu caltiénse en 1.967.

72 pacientes tán hospitalizaos con confirmación o sospecha de COVID-19, 2 menos que'l llunes, a los qu'hai que sumar otros 31 na UCI, 2 más.

Na semeya, un ciudadanu recibe una dosis de 'Comirnaty' de Pfizer/BioNTech nel avilesín Complexu Deportivu Los Canapés.