Dos contautos de la muyer residente en Ḷḷuarca dan positivu nuna xornada na que se detecten otros 3 casos más de COVID-19

Asturies suma 5 casos nuevos de COVID-19, lo que lleva a la Conseyería de Salú a estudiar la posibilidá de declarar un biltu nel país. Dos son contautos estrechos de la muyer dominicana residente en Ḷḷuarca, otru rexistróse nel Hospital de Xarrio y los dos restantes en Xixón, una pareya na que la muyer viaxó a Chile.

Anque nun primer momentu dieron negativu les cuatro persones estudiaes pol Sistema de Vixilancia de Contautos Estrechos, dos d’ellos tán afeutaos pola enfermedá que provoca’l coronavirus SARS-CoV-2. Nel occidente hai un terceru, de los que se tán investigando los contautos.

Nun son los únicos casos nuevos, yá qu’en Xixón dio positivu una pareya moza. La muyer ta acabante de llegar d’un viaxe a Chile.

D’esta forma, el total del casos de COVID-19 medra hasta 2.442. Na UCI siguen ingresaos 3 pacientes y en planta 1, mentes que, según los datos aportaos por Salú, la serie de curaciones rexistra ún menos pa quedar en 2.077.

Esta tarde, les mázcares obligatories

El Conseyu de Gobiernu estraordinariu nel que se va decretar la obligatoriedá de la mázcara n’espacios públicos, magar se pueda caltener la distancia de seguranza interpersonal, va celebrase finalmente esta tarde. El conseyeru Pablo Ignacio Fernández Muñiz va encargase d’informar de los detalles de la midida a les 17.05 hores.

Na semeya, un sanitariu toma una muestra pa facer un PCR a una persona.