Salú informa de 541 casos nuevos esti miércoles

|
Pablo Ignacio Fernández Muñiz Conseyu Interterritorial del Sistema Nacional de Salud telemáticu

Per segunda xornada rexístrase una muerte con COVID-19, un home de 86 años.

A falta de la espublización de los datos oficiales, la Conseyería de Salú informó de la detección de 541 casos nuevos ayeri. Son 24 menos que'l martes, cuando comunicó 565.

El Serviciu de Salú del Principáu d'Asturies (SESPA) fixo 4.302 pruebes de diagnósticu d'infeición activa, polo que la tasa de positividá s'asitió nel 14,16 por cientu, superior a la de la xornada anterior, cuando foi del 11,76 por cientu con 5.415 tests fechos. Ayeri nun hebo actualización de los datos oficiales, polo que'l porcentaxe a 7 díes últimu comunicáu foi'l correspondiente al llunes, un 14,8 por cientu –ayeri baxó al 14,51 por cientu–.

Hai que llamentar la muerte númberu 1.984 del andanciu, la d'un home de 86 años que se suma a la d'una muyer de 63 del día anterior. Nun s'acumulaben finaos en xornaes siguíes dende'l 16 de xunu, con 4 finaos más rexistraos nesti tiempu hasta ayeri.

73 pacientes tán hospitalizaos con confirmación o sospecha de COVID-19, 7 más que'l martes, a los qu'hai que sumar 19 ingresaos na UCI, mesma cantidá que na xornada anterior.

Na semeya, el conseyeru Pablo Ignacio Fernández Muñiz participa ayeri nel Conseyu Interterritorial telemáticu del Sistema Nacional de Salud, onde s'aprobó un alcuerdu de distribución de creitu nel marcu del Plan d'Inversiones n'Equipos d'Alta Teunoloxía (INVEAT), pol qu'Asturies va recibir cuasi 13 millones d'euros esti añu.

Contador Estadistiques