Aprobaos 10,2 millones n'ayudes pa 400 negocios d'ociu nocherniegu

Esti xueves rexistráronse 538 contaxos.

El Conseyu de Gobiernu d'esta mañana autorizó la convocatoria especial d'ayudes de 10,2 millones d'euros pal sector del ociu nocherniegu, que va beneficiar al rodiu de 400 chigres. Esta cantidá podría llegar a ampliase, nel casu de que fora necesario, en 5 millones más.

Cada empresariu podrá recibir ente 25.000 y 35.000 euros por negociu, dependiendo del númberu d'emplegaos col que cuente. Les solicitúes van empezar a tramitase el martes, con un plazu de 15 díes naturales pa presentales.

Esta convocatoria forma parte del fondu de 100 millones incluyíu nel Presupuestu, que se financia, como parte de la respuesta de la Xunión Europea a la pandemia de COVID-19, con recursos del paquete REACT-EU.

Ensin finaos

A falta de la espublización de los datos oficiales de la COVID-19, la Conseyería de Salú comunicó la detección de 538 casos nuevos ayeri. Son 3 menos que'l miércoles, cuando s'informó de 541.

Fixéronse 4.706 pruebes de diagnósticu d'infeición activa, polo que la tasa de positividá s'asitió nel 14,72 por cientu. A 7 díes esti porcentaxe taba'l miércoles nel 14,51 por cientu –ayeri baxó al 14,08 por cientu–.

Nun hebo que llamentar finaos cola enfermedá causada pol coronavirus SARS-CoV-2, qu'acabó cola vida de 1.984 persones n'Asturies. Nes dos xornaes previes morrieren dos persones.

81 pacientes tán hospitalizaos con confirmación o sospecha de COVID-19, 8 más que'l miércoles. A ellos hai que sumar 18 ingresaos na UCI, 1 menos.

Na semeya, Ana Cárcaba, conseyera de Facienda, qu'esplicó los detalles de la convocatoria nueva d'ayudes.