Baxa hasta los 50 años la edá media de los ingresaos con COVID-19

La cuarta fola de la pandemia, que dexó esti martes 565 contaxos y la muerte d'una muyer de 63 años, ta afeutando sobre manera a la xente mozo, entovía ensin vacunar, lo que se ta reflexando na baxada de la edá media de los ingresaos con COVID-19- Ésta asítiase agora nos 50 años, con un 30 por cientu menor de 40.

La Conseyería de Salú vien alvirtiendo d’esti descensu, rescamplando que trés de cada cuatro pacientes hospitalizaos por coronavirus SARS-CoV-2 nun tán vacunaos o nun pudieron completar la pauta. La edá media de los pacientes asítiase nos 50 años, mentes que la metá de los 19 ingresaos na UCI tienen menos de 54.

Otra manera, trés de cada diez persones hospitalizes entá nun cumplieron 40 años. Salú tien en marcha anguaño una campaña pa vacunar a los mayores de 50 que nel so momentu refugaren el preparáu o nun pudieren por tar enfermos pa evitar ingresos nuevos.

66 persones tán hospitalizaes agora con confirmación o sospecha de COVID-19, a los qu’hai que sumar otres 19 na UCI, 2 y 4 más que’l martes, de manera respeutiva. La ocupación total por COVID-19 nos hospitales ye del 2,56 por cientu y, nel caso de les UCI, del 6,37% por cientu.

Tasa de positividá del 11,76 por cientu

A falta de la espublización de los datos oficiales de la COVID-19, comunicóse la detección de 565 casos nuevos ayeri. Son 122 más que la xornada anterior, cuando s’informó de 443.

Fixéronse 5.415 pruebes de diagnósticu d'infeición activa, polo la tasa de positividá s’asitió nel 11,76 por cientu, pol 13 por cientu del martes, con 3.969 tests realizaos. A 7 díes esti porcentaxe yera enantes de l’actualización del 14,8 por cientu.

Hebo que llamentar la muerte d’una muyer de 63 cola enfermedá causada pol coronavirus SARS-CoV-2, la 1.983 del andanciu.

Na semeya, el pabellón de Perchera-La Braña, centru de vacunación en Xixón, esta mañana.