Los cuatro biltos activos del oriente sumen 60 positivos

La Conseyería de Salú, que recibió crítiques del Ayuntamientu de Llanes y empresarios de la zona pola declaración d’alerta naranxa en cinco conceyos del oriente, informó esti xueves sobre los cuatro biltos activos esistentes na zona. En total son 60 los positivos detectaos en brotos en Llanes, Ribeseya, Parres y Cabrales.

El focu con más casos de COVID-19 ye’l de la escuela de surf de Llanes, con 26 contaxos. Éstos alcanzaríen tamién Caravia, según espusieron na rueda onde s’anunció la decisión de declarar l’alarma naranxa en Ribeseya, Llanes, Parres, Cangues d’Onís y Cabrales pola alta incidencia de la enfermedá causada pol coronavirus SARS-CoV-2.

Dende l’Ayuntamientu de Llanes emitióse hores depués un comunicáu nel que pidía “saber por qué foi incluyíu na alerta naranxa si oficialmente nun hai biltu nengún nel conceyu tres el detectáu en xunetu y yá controláu”, reclamando al Gobiernu que facilitara “el númberu de casos positivos esistentes nel conceyu”. Güei Salú aportó los datos demandaos, confirmando que son 17 los vecinos afeutaos.

30 turistes dieron positivu

Los otros trés biltos del oriente sumen otros 34 casos. El de Ribeseya algama los 14 contaxos, mentes que los detectaos en Parres y Cabrales cuenten con 10 positivos caún.

Salú informa que la tremisión del virus llegó a persones de otros conceyos y comunidaes. Asina, 8 afeutaos residen n’otros llugares d’Asturias y polo menos 30 turistes foron diagnosticaos nel país con COVID-19 enantes de regresar a los sos llugares d’orixe.

No que respeuta a los vecinos de la zona, detectáronse 15 positivos en Parres, 9 en Cabrales, 4 en Ribadeseya y 3 en Cangues d’Onís. Dende'l 1 de xunetu, el Serviciu de Vixilancia Epidemiolóxica confirmó 130 casos de residentes y visitantes venceyaos cola área sanitaria VI y ta faciendo'l siguimiento a 250 contautos estrechos na zona, produxéndose'l 75 por cientu de los contaxos n'agostu.

Na imaxe, Llanes. Semeya obra de Tomás Senabre baxo llicencia CC BY-SA 2.5 ES.