Salú asoleya un mapa qu’informa de la situación de cada conceyu y les sos restricciones

|
Mapa tercer fola del Observatoriu de Salú n’Asturies

Cola fin de facilitar a les asturianes y asturianos la situación na que ta’l so conceyu y los 77 restantes, la Direición Xeneral de Salú Pública incorpora al so panel informativu un mapa cola situación epidemiolóxica y les restricciones de caún d’ellos. Grau, Avilés, Castrillón y Corvera son los que tien agora midíes más restrictives, a los que se van sumar el xueves Uviéu, Cangas del Narcea y Llanes.

Nun periodu de la pandemia na que, pa evitar una tercer fola tan dura como la segunda, el Gobiernu punxo en marcha restricciones xenerales pa tol país y otres más dures p’aquellos conceyos qu’algamen el nivel d’alerta 4+ (riesgu estremu), l’Observatoriu de Salú n’Asturies, venceyáu a Salú Pública, ta acabante d’asoleyar un mapa virtual –disponible namái en castellanu– pa facilitar la consulta de cómo ye la situación en cada territoriu. Asina, na pestaña ‘Mapa Medidas’, pasando’l ratón per cada llugar los ciudadanos van poder informase de la incidencia acumulada a 14 díes, la incidencia acumulada a 14 díes en mayores de 65 años y la trazabilidá –los trés indicadores con llendes diferentes según la población (más de 30.000 habitantes, ente 10.000 y 30.000 y menos de 10.000) que nel casu que se superen per 3 díes siguíos activen darréu les midíes per 14 díes, a los que se sumó a última hora la condición de llevar trés díes nel nivel 4 según el baremu del Ministeriu de Sanidá– que tien nesi momentu y les restricciones concretes coles que cuenta.

Les nueves, anunciaes el sábadu, son el el zarru perimetral del conceyu, aconceyamientos d'un máximu de 4 persones y axuntamientos en domicilios permitíos namái con convivientes, amás pieslle d'interiores en chigres y de grandes superficies sacante alimentación, y prohibición de práutica deportiva que nun sía al aire llibre, ente otros. N’Avilés, Catrillón y Corvera entraron güei a valir y el Gobiernu yá comunicó a Uviéu, Cangas del Narcea y Llanes que mañana va ser el so turnu, con Gozón como siguiente na llista nel casu de nun ameyorar los sos datos epidemiolóxicos.

Otru casu ye’l de Grau, con restricciones previes polos biltos provocaos nes fiestes navidiegues y midíes individulizaes, como’l pieslle total de la hostelería. Nuna situación tan cambiante, esta ferramienta, que se va actualizar de manera diaria, va permitir a los ciudadanos conocer nel intre les midíes afitaes en cada conceyu o si pue desplazase a un llugar concretu del país o non.

Contador Estadistiques