Avilés, Castrillón y Corvera son los conceyos onde van entrar les restricciones nueves

El martes van entrar a valir les restricciones nueves del Gobiernu pa torgar l’espardimientu del coronavirus SARS-CoV-2, que se van establecer por conceyos. Llangréu finalmente nun cumple los indicadores afitaos, polo qu’Avilés, Castrillón y Corvera son los únicos qu’apaecen na llista anunciada esti sábadu.

Les restricciones son, per 14 díes, el zarru perimetral del conceyu, aconceyamientos d'un máximu de 4 persones y axuntamientos en domicilios permitíos namái con convivientes –nel momentu de la redaición d’esta noticia lo único asoleyao nel BOPA nun decretu robláu pol presidente Adrián Barbón y, poro, confirmao–, pieslle d'interiores en chigres y de grandes superficies sacante alimentación, y prohibición de práutica deportiva n'interiores, ente otros por especificar nun decretu de la Conseyería de Salú entovía nun espublizáu nel BOPA. Los alcaldes d’estos trés ayuntamientos taben avisaos d’esta posibilidá, pero si nos díes próximos otros llugares algamaran les cifres marcaes per 3 díes siguíos tendríen 48 hores p’afayase a la situación.

En concreto mírase, con diferencies según la población (más de 30.000 habitantes, ente 10.000 y 30.000 y menos de 10.000), la incidencia acumulada a 14 díes, incidencia acumulada a 14 díes en mayores de 65 años y trazabilidá. Avilés, Castrillón y Corvera sobrepasen la llende los díes 14, 15 y 16, polo que tán en nivel d’alerta 4+.

Grau, pela so parte, sigue coles sos restricciones propies, y Siero, que nun ta nesta primer llista, tomó midíes pa contener les sos cifres como’l pieslle de centros deportivos y culturales. Otros conceyos, como Uviéu, Gozón, Cangas del Narcea o Llanes, queden tamién fuera, pero nel casu de que los sos datos empeoraren podría pasar a sufrir les midíes nueves.

Na semeya, el conseyeru de Salú, Pablo Ignacio Fernández Muñiz, nun aconceyamientu virtual celebráu esta mañana cola Delegación del Gobiernu estatal n'Asturies y la Federación Asturiana de Conceyos (FACC) pa informar de les midíes nueves.