Los contaxos algamen la cifra más alta de la tercer fola: 366 casos nuevos

|
Lluanco por Pelayoaa

La tasa de positividá asitióse nun 8,88 por cientu nuna xornada con 7 finaos. Gozón sumáse a la llista de conceyos con restricciones, que van entrar el vienres.

La Conseyería de Salú informó de 366 contaxos ayeri –los datos oficiales de la COVID-19 sumen 4 más non contabilizaos en díes previos– depués de dellos díes perbaxo de los 300 casos. Son 87 más qu'ayeri, cuando se rexistraron finalmente 279, y trátase de la cifra más alta de la tercer fola al superar los 356 del vienres.

Fixéronse na xornada 4.956 pruebes de diagnósticu d'infeición activa, una cantidá mui asemeyada a la del día anterior, polo que la tasa de positividá ascendió del 6,89 al 8,88 por cientu. A 7 díes, esti datu ye del 9 por cientu.

Hai que llamentar la perda de 7 vides cola enfermedá cuasada pol coronavirus SARS-CoV-2: la de cuatro muyeres de 100, 93, 85 y 80 años y la de trés homes de 90, 86 y 73, trés d'ellos residentes en centros de mayores. Dende qu'entamó l'andanciu finaron un total de 1.426 persones.

Alcuéntrense hospitalizaos 329 pacientes con confirmación o sospecha de COVID-19, 24 más que'l llunes, a los qu'hai que sumar 54 que tán na UCI, 7 menos que'l día anterior.

Octavo territoriu con midíes más ríxides

Gozón va convertise'l vienres nel octavu conceyu con midíes más ríxides al tar en nivel d'alerta 4+ (riesgu estremu), yá actives dende ayeri n'Avilés, Castrillón y Corvera y que mañana va entar n'Uviéu, Llanes y Cangas del Narcea. Completa la llista Grau, con restricciones entá más estrictes polos biltos esistentes tres les fiestes navidiegues, a la que se podría sumar el sábadu Noreña.

Na imaxe, Lluanco, capital de Gozón. Semeya obra de Pelayoaa baxo llicencia CC BY-SA 4.0.

Contador Estadistiques