Roglič sal d'Asturies reforciáu como líder

|
Pogačar, López Moreno y Roglič nel Alto'l Palo

Bennett ganó na meta d'Uviéu, Kuss en L'Acebu y Fuglsang nel Alto'l Palo.

Les etapes asturianes de La Vuelta nun traxeron cambios nel lideratu, nel que sigue Primož Roglič. L'eslovenu del Jumbo-Visma nun amosó debilidá nes dos xornaes d'altu monte de la carrera nel país y amplió la so ventaya con Alejandro Valverde (Movistar), que sigue segundu, agora a 2:48 tres perder 21 segundos na cima ḷḷeniza, col tamién eslovenu Tadej Pogačar (UAE) terceru tres superar na xeneral a los colombianos Miguel Ángel López Moreno (Astana) y Nairo Quintana (Movistar), ésti últimu agora sestu.

La primer etapa con final n'Asturies, el sábadu n'Uviéu, foi pal irlandés Sam Bennet (Bora-Hansgrohe) tres una arrancada na pindia cai Xovellanos, con meta instalada frente al Teatru Campoamor. Na xornada siguiente, destinada yá a escaladores, el trunfu foi pal estauxunidense Seep Kuss (Jumbo-Visma) que dio una exhibición en L'Acebu tres metese na escapada bona, permitiéndose nel quilómetru últimu celebrar colos aficionaos la victoria chocando inclusive les manes con ellos.

Na xuba canguesa Roglič fíxose fuerte, respondiendo al ataque de Valverde, únicu de los favoritos que pudo aguantar el ritmu del líder. Nun foi asina nel Alto'l Palo, el llargu puertu que s'estrenaba en La Vuelta, onde'l murcianu perdió tiempu col del Jumbo-Visma y los sos otros dos competidores en llinia de meta, que crució en primer llugar el danés Jakob Fuglsang (Astana), protagonista d'una escapada que llegó a les ramples de La Cubieḷḷa con nueve minutos de ventaya.

Selmana cabera de carrera

Tres la xornada de descansu de güei, a la Vuelta queden-y cinco etapes na que'l líder nun contará con situaciones escesivamente peligroses. Trés d'elles son llanes, con dos de montaña, el xueves y el sábadu, ésta última con final n'altu, na Plataforma de Gredos, puertu de tercer categoría.

Na semeya, Pogačar llegando a la llinia de meta del Alto'l Palo, con López Moreno y el líder Roglič a la so rueda.

Contador Estadistiques