4,6 millones de persones disfrutaron pela televisión sólo nel Estáu de los paisaxes asturianos al pasu de La Vuelta

Les trés etapes asturianes de La Vuelta axuntaron a miles d’aficionaos de dientro y fuera d’Asturies nes carreteres del país y a 4.690.000 frente a la televisión sólo nel Estáu, a lo qu’hai que sumar los de la señal internacional. Nes emisiones nun se respetó la toponimia oficial, dalgo que debería camudar l’añu qu’entra col pasu de Turismu de la conseyería d'Industria a la de Cultura.

Por xornaes, la del llunes, con salida en Pravia y meta nel Alto’l Palo, tuvo'l final más siguíu, al llegar a los 2.086.000 d'espectadores, siendo líder d'audiencia nel so tramu d'emisión. La etapa celebrada'l domingu, ente Tinéu y el L’Acebu, y la del sábadu, que concluyó n'Uviéu, axuntaron frente al televisor a 1.801.000 y 807.000 persones, de manera respeutiva, con picos de dos millones nel casu de que terminaba na cima canguesa.

A la señal televisiva en direuto hai que sumar la realizada polos 1.144 profesionales de 327 medios de comunicación acreitaos nesta edición de La Vuelta, lo que multiplica l'algame y la repercusión de la imaxe d'Asturies como escenariu de la prueba ciclista, con gran repercusión nesta edición en países como Colombia o Eslovenia, país d’orixe del líder Primož Roglič. Amás del impautu mediáuticu la carrera ciclista tien un importante impautu económicu, yá quetrai consigo una caravana formada por 3.000 persones ente competidores, profesionales de los cuerpos y fuerces de seguridá y periodistes, que podríen dexar, según les estimaciones de la organización, un millón y mediu d'euros en gastu direutu.

La toponimia

Según confirmó Javier Guillén, direutor de La Vuelta, la competición ciclista va tornar a Asturies l’añu qu’entra. Va ser una bona oportunidá pa que, d’una vegada, el llibru de ruta de la carrera –que ye’l que siguen les retresmisiones televisives– respete la toponimia tradicional, la oficial, al igual que fixo nesta edición na Comunitat Valenciana, Catalunya, Navarra y Euskadi.

La escusa dada n’años anteriores dende la Conseyería d’Educación y Cultura, que trabayó nesti asuntu, ye que Turismu –que s’encarga de la presencia d’Asturies en La Vuelta– dependía d’Emplegu y Industria, situación que camuda col organigrama nuevu del Gobiernu. Agora Turismu pasa a tar baxo’l paragües de Cultura, que tamién lleva Política Llingüística, polo que s’espera que pa la edición del 2020 el casu asturianu nun sía una esceición ente los territorios con llingua propia.

Na semeya, ambiente na llinia de meta del Alto'l Palo a la espera de la llegada de los ciclistes.