Asturies recibe a La Vuelta con trés etapes, dos d'elles decisives

Les que tienen final en L'Acebu y l'Alto'l Palo van ser xueces de la carrera ciclista.

Torna La Vuelta a Asturies y les carreteres asturianes tornen a ser decisives pa la xeneral. Mañana'l pelotón entra nel país per Cantabria, nuna etapa que sal de San Vicente de la Barquera y que va pasar per Colombres, Ribeseya, Colunga, Villaviciosa y Xixón pa xubir darréu l'Altu La Madera, de tercer categoría, y finar n'Uviéu, na cai Xovellanos al altor del Teatru Campoamor.

Nun s'esperen movimientos na clasificación nesta xornada, anque sí podría habelos el domingu, cuando los ciclistes partan de Tineú en direición a L'Acebu. La mítica xubida, bien conocida en La Vuelta, conviértese nesti añu per primer vegada en final d'etapa de la carrera, nel Santuariu, nun percorríu previu que va llevar a ascendela previamente pa depués dirixise al Pozu las Muyeres Muertas y El Counio, los dos de primer categoría.

La tercer de les etapes asturianes va tener un final inéditu, un puertu llargu al más puru estilu francés: l'Alto'l Palo, de 28 quilómetros. Con salida de Pravia, el pelotón va dirixise al puertu de San Llorienzu, pa xubir depués La Cobertoria, dambos de primer categoría, y dirixise hacia'l valle La Cubieḷḷa.

Roglič, líder

A falta del final de la etapa de güei en Los Machucos, previsiblemente va llegar como líder a Asturies l'eslovenu del Jumbo-Visma Primož Roglič, que se ta disputando la carrera col veteranu Alejandro Valverde (Movistar) y los colombianos Miguel Ángel López Moreno (Astana) y Nairo Quintana (Movistar), col tamién eslovenu Tadej Pogačar (UAE) na batalla. L'únicu asturianu presente en La Vuelta ye Dani Navarro, xefe de files del Katusha-Alpecin, qu'ocupa la posición cuarentena sesta, a 52 minutos y 22 segundos del maillot coloráu, y buscará dexase ver nes carreteres asturianes.

Na imaxe, L'Acebu. Semeya obra de franckblacknoir baxo llicencia CC BY-SA 3.0.