Rodríguez Medina gana'l XX Concursu de Cuentos pola Oficialidá del Asturianu de Bimenes

|
Rodríguez Medina gana'l XX Concursu de Cuentos pola Oficialidá del Asturianu de Bimenes

L'escritor de L'Entregu, que va recibir el premiu nun eventu nel qu'actúa Cellero, presentó la obra 'Los restos d'un naufraxu'.

El xuráu compuestu polos escritores Xulio Vixil, Ana Esther Martínez Sierra y Francisco Álvarez González, amás de pol alcalde, Aitor García Corte, y el téunicu responsable de la Estaya de Cultura, Daniel Cueli, que fixeron les funciones de presidente y secretariu, de manera respeutiva, escoyeron el trabayu de Pablo Rodríguez Medina como merecedor del XX Concursu de Cuentos pola Oficialidá del Asturianu. L'autor lleva una recompensa de 600 euros.

'Polly a les puertes del paraísu', de Lluis Aique Iglesias, algamó'l segundu puestu, dotáu con 450 euros, y 'Ca tolos vientos', de Llucía Fernández Marqués, el terceru, polo que lleva 300 euros. La entrega de los premios va celebrase'l sábadu, a les 12.30 hores, en Suares, en concreto na Casa les Radios.

Rodríguez Medina va proceder a lleer 'Los restos d'un naufraxu' tres un actu protocolariu, mentes que Carlos Alba 'Cellero' va poner la nota d'humor cola representación de 'La llei del cuchu'.

XVIII Concursu de Gaita

El xueves, a les 12 hores, fina'l plazu pa inscribise nel XVIII Concursu de Gaita de Bimenes, que va celebrase'l sábadu a les 17 hores na Casa Cultura de Santuyano. El requisitu imprescindible pa poder participar nel mesmu ye ser menor de 21 años a fecha del 30 de payares y los premios a repartir ente los trés primeros clasificaos ye de 375 euros, más trofeos.

Contador Estadistiques