Bimenes convoca'l XXI Concursu de Cuentos pola Oficialidá del Asturianu

El plazu pal unvíu de les creaciones lliteraries va tar abiertu hasta'l 31 de mayu.

El Conceyu de Bimenes entama un añu más el Concursu de Cuentos pola Oficialidá del Asturianu, una iniciativa que caltién pese a nun recibir nengún tipu de sofitu económicu esternu, ayudes que caltuvo hasta l'añu 2012. Según afiten les bases de participación, tolos rellatos que se presenten al premiu –ún por persona– han de ser inéditos y deben tar redautaos en llingua asturiana, respetando les normes ortográfiques vixentes.

Éstos nun deben esceder les diez fueyes, mecanografiaes a doble espaciu per una cara. Los participantes han de presentar un orixinal del cuentu, trés copies del mesmu y otra más en CD, too ello baxo un nomatu que debe apaecer nuna plica con tolos datos personales y con un currículu con semeya.

Un xuráu formáu por trés persones cualificaes y presidíu pol alcalde de Bimenes, Aitor García Corte, va decidir el ganador del concursu, que va recibir 600 euros, asina como'l segundu y el tercer clasificáu, que tamién van llograr una recompensa de 450 y 300 euros, de manera respeutiva. Na edición del añu pasáu, el ganador d’esti concursu foi Pablo Rodríguez Medina cola obra Los restos d'un naufraxu', mentes que'l segundu premiu llevólu Lluis Aique Iglesias con ‘Polly a les puertes del paraísu’ y el terceru, Llucía Fernández Marqués con ‘Ca tolos vientos’.

Apertura de pliques, el 3 de xunetu

Los interesaos en participar han d’unviar la so creación enantes del 31 de mayu nun sobre al Conceyu de Bimenes –faciendo referencia al concursu– (Plaza de Miranda de l Douro, s/n, códigu postal 33527 de Martimporra). L’apertura de pliques va tener llugar el 3 de xunetu nun actu abiertu al públicu, xornada na que tamién va anunciase'l día nel que va celebrase l'actu d'entrega de premios.

En casu de duldes sobre’l funcionamientu del certame, la organización pon a disposición de los concursantes un teléfonu: el 985.700.004.