PSOE y Xuníes Podemos presenten una enmienda a los PXE pa una partida de 40.000 euros pa l'ALLA

La tan demandada partida pa l’Academia de la Llingua Asturiana (ALLA) nos Presupuestos Xenerales del Estáu (PXE) podría llegar nes cuentes del 2021 d’aprobase la enmienda presentada pol PSOE y Xuníes Podemos al respeuto. Sería de 40.000 euros, inferior a la del restu d’academies de les llingües peninsulares cooficiales.

Los presupuestos presentaos pol Gobiernu de coalición del PSOE y de Xuníes Podemos, que yá superaron les enmiendes a la totalidá nel Congresu, dexaba un añu más ensin perres procedentes del Estáu a l’ALLA. Con esta enmienda iguaríase esta inxusticia pa cola institución académica, la única que queda siempre fuera del repartu de fondos.

Sicasí, la cantidá propuesta sigue siendo baxa en comparanza a la de les academies de les otres llingües cooficiales. Si pa l’ALLA solicítense 40.000 euros, la Real Academia Galega y l’Institut d’Estudis Catalans reciben 311.380 al traviés del Ministeriu de Ciencia y Innovación, y Euskaltzaindia 220.000.

Pela so parte, pa la Real Academia Española destínense 6.827.420 euros y la Comisión Permanente de la Asociación de Academias de la Lengua Española, 83.650.

Llabor de Morís y Fernández Castañón

Iniciativa pol Asturianu vien dende la so fundación trabayando nesta posibilidá pa que l’ALLA reciba financiación estatal pa desendolcar el so llabor, torgáu en munches estayes, como’l de la espublización, pol curtiu presupuestu que mueve. Esti mesmu añu, en febreru, respresentantes d’esta organización desplazáronse a Madrid p’aconceyar con diputaos y senadores asturianos pa tratar ésta y otres cuestiones, algamando compromisos al respeuto.

“Magar les dificultaes d’un momentu complicáu por razones evidentes, y anque nel proyectu orixinal de presupuestos la partida nun apaez, el trabayu conxuntu con diputaos y diputaes asturianos fixo que’l llogru fuera posible esti añu. Una enmienda conxunta de PSOE y Podemos, trabayada especialmente polos diputaos Roberto Morís y Sofía Castañón, va permitir nesta ocasión que per primer vegada na hestoria l’Academia de la Llingua Asturiana cunte con una partida”, celebra Iniciativa pol Asturianu, que recuerda que “la cantidá d’esta partida, 40.000 euros, entá nun equipara a la institución asturiana col restu d’academies”.

Sicasí, celebra esti pasu dau porque “nunca enantes una partida de los PXE tuvo dedicada a la promoción del asturianu”. “Ésta ye la prueba de que la llingua asturiana necesita más que nunca trabayu en positivu, esfuercios y siguir sumando a xente de diferentes ideoloxíes a la defensa del idioma. Tenemos que siguir sumando voluntaes y dando pasos a favor de la normalización social del idioma”, aseguren dende’l coleutivu.

El 1 de xineru como perspeutiva

Tres pasar el trámite de les enmiendes a la totalidá, los PXE van pasar a la Comisión de Presupuestos, que tien hasta’l 27 pa ellaborar un dictame. Darréu, va dir al Plenu del Congresu, na primer selmana d’avientu, y llueu al Senáu, cola idea de que puedan entrar a valir el 1 de xineru.

D’esta forma, l’Estáu va contar con Presupuestos nuevos depués de que los del 2018 del Gobiernu de Mariano Rajoy se prorrogaran nel 2019 y 2020.

Partíes incluyíes nos Presupuestos Xenerales del Estáu 2021.

Enmienda a los Presupuestos Xenerales del Estáu 2021.