Iniciativa recuerda a los partíos los sos compromisos pa que los PXE incluyan una partida pa l’ALLA

Diputaos y senadores de PSOE, PP, Xuníes Podemos y Foro aconceyaos con representantes d’Iniciativa pol Asturianu confimaron meses atrás en Madrid a la organización el so compromisu pa que l’ALLA tenga una partida nos Presupuestos Xenerales. Ye la única academia que nun recibe dineru del Estáu.

“Esta ye una reclamación hestórica de la nuesa organización y qu’alcontró sofitos a lo llargo de casi 10 años de trabayu en diferentes partíos en PP, PSOE, IX, Podemos o Foro. Cuando aconceyamos colos representantes asturianos nes Cortes siempres atienden esta reclamación”, recordó Iván Llera, presidente d’Iniciativa pol Asturianu. D’esta forma se pretende iguar l’asturianu “coles demás llingües d’España y en definitiva llogra poner nel llugar que-y cuerrespuende a la institución más importante pal idioma”.

Coles mesmes, fai un llamáu “al Gobiernu d’España pa llograr igualdá pal idioma na cuestión de la financiación de l’Academia de la Llingua”. Tanto la Real Academia Española, como l'Institut d'Estudis Catalans, la Real Academia Galega y la Euskaltzaindia, tienen partíes de mayor o menor cuantía a cargu de los Presupuestos Xenerales del Estáu (PXE), siendo l’ALLA la única que nun recibe perres.

Na semeya, llar de l'ALLA.