Los Presupuestos Xenerales del Estáu destinen un 7,1 por cientu menos a Asturies nel 2016

El país va recibir 307,66 millones d’euros, convirtiéndose nel cuartu territoriu nel que más baxa la inversión. Les ayudes a la minería descienden un 3,66 por cientu.

Murcia ye’l territoriu onde más mengua la inversión del Estáu, un 22,75 por cientu, siguíu de Castilla y Lleón (-16,78 por cientu) y Cantabria (-10,49 por cientu). Na parte contraria, Euskadi ye’l que ve más aumentada l’aportación estatal, con un 23,46 por cientu, llista na que tamién destaquen Illes Balears (15,27 por cientu) y la Comunitat Valenciana (12,24 por cientu). Les perres que recibe Asturies ye un 2,8 por cientu del total sobre los 3.231,21 millones de euros previstos pal 2016 pa les comunidaes autónomes.

Les ayudes a la minería tamién descienden, nesti casu un 3,66 por cientu, situándose en 377,14 millones de euros. Mentes, destínase al AVE n’Asturies 397,2 millones d’euros, de los 235 van pa la variante de Payares.

Descontentu de Javier Fernández

Les primeres impresiones del presidente del país, Javier Fernández, con respeuto a los Presupuestos Xenerales del Estáu nun son bones, pendientes d’un estudiu más profundu. Calificó de “negativu” el descensu del 7,1 por cientu de la inversión n’Asturies, al igual que la mengua de les ayudes a la minería, y anunció que mañana fadrá una valoración más fonda.