Indignación xeneral n’Asturies colos Presupuestos del Estáu, cola esceición única del PP

Podemos considera que “dan el llombu a la población asturiana” y Andecha afirma que “l’Estáu ta fundiendo Asturies”. La patronal asegura que nun van ayudar al país a salir de la crisis.

La mengua del 7,1 por cientu nos Presupuestos Xenerales del Estáu, con un montante total de 307,66 millones d’euros, provocó critiques xenerales nel país, cola esceición única del PP asturianu. Pa Podemos estes cifres sirven pa consolidar “l’abandonu a Asturies” y “dan el llombu a la población asturiana”, apuntando que la mengua real ye del 30 por cientu teniendo en cuenta los cuatro exercicios últimos. Al empar, apunta que “les inversiones anuncies consoliden un modelu económico ineficaz y ensin perspeutiva de futuru”.

Esta formación entiende que “los nuevos presupuestos amuesen l’interés escasu de Mariano Rajoy pol sufrimientu de la población; unos presupuestos alloñaos de la realidá económica” qu’apuesten “por un modelu basáu na precariedá llaboral y non na inversión productiva”. Al respeuto, apunta “que recortar inversión y aumentar la llende del déficit nun va reactivar la economía asturiana y, poro, ye necesaria una posición firme pa enfrentarse a les polítiques de Rajoy”. Nesi sen, aboga por un Gobiernu nacional “que defenda los intereses de los asturianos y las asturianes; la dignidá de la so xente”, pa depués añadir que Javier Fernández contará col apoyu de Podemos si sigue esi camín.

Pela so parte, Andecha Astur señala que “el retayu nueu de la inversión estatal n’Asturies que se deriva de los presupuestos xenerales pal añu que vien, precisamente en momentos nos que se presume de recuperación económico, amestao al  conxuntu d’indicadores llaborales y económicos del nuesu país, non sólo indiquen ónde tamos, sinón escontra ónde mos lleva l’Estáu español”. Asina falen de “discriminación” contra Asturies, que va “vese abocada a una sistemática destruición del so texíu económicu”.

“El problema nun ye namás qu’Asturies nun pinte nada nel conxuntu del Estáu español, nin del calter sucursalista de los partíos políticos con representación institucional nel nuesu país, sinón de la esistencia d’una política afitada pol Estáu español p’Asturies, independientemente del partíu que gobierne, y de la imposición dende Madrid d’una institución autonómica como ye’l ‘Principado’ que nun tien más función que la d’actuar comu correa de tresmisión de les polítiques españoles n’Asturies, y que ye dafechu incapaz de defender los intereses de los asturianos”, continúa Andecha, que recuerda que’l presidente Javier Fernández “ta más esmolecíu por  Cataluña y España, a xulgar poles sos recientes intervenciones, que pola complexa problemática asturiana, y costitúi toda una espresión de lo que podemos esperar d’elli”. La formación nacionalista apuesta pola “recuperación d’instituciones soberanes asturianes que representen al nuesu pueblu y defendan los sos llexítimos intereses”.

La Federación Asturiana de Empresarios (FADE) tampoco nun aprueba la inversión del Gobiernu estatal pal país. “Nun tamos énte los presupuestos qu’Asturies necesita pa salir de manera definitiva de la crisis”, apunta la patronal, que llamenta “l’agraviu comparativu con otres rexones”.

“Trátense d’inversiones que tornen a concentrase nes grandes obres públicas en marcha, principalmente en proyeutos yá comprometíos n’exercicios anteriores, como la Variante de Payares. Les importantes dotaciones que reciben estes obres son positives pa la rexón, pero non por ello debemos obviar qu’en dalgunos casos trátense de proyeutos qu’acumulen años de retrasu y que yá debíen entrar en serviciu”, añade la FADE.

El PP asturianu contra toos

Tola oposición y los sindicatos amosaron la so disconformidá coles cuentes estatales p’Asturies, namái defendíes pol Partido Popular (PP). Mercedes Fernández llamó al PSOE a apoyar los presupuestos porque “Asturies y España necesítenlos”. “Nun tiene sentíu facer comparaciones ente les partíes consignaes cuando Asturies taba nun estáu d’incomunicación absoluta per tren o carretera y les qu’hai agora”, apuntó.