La inversión del Estáu n’Asturies mengua nun 31,33 por cientu

|
Cristóbal Montoro y Ana Pastor Presupuestos Xenerales 2017

Los Presupuestos Xenerales del Estáu destinen a Asturies esti 2017 una inversión de 211,25 millones d’euros, lo que supón un 31,33 por cientu menos que l’añu pasáu (307,66 millones d’euros). L’acumulación d’años de mengua lleva al país a cifres del sieglu XX.

La inversión estatal más alta n’Asturies llegó nel añu 2009, con 1.019 millones d’euros destinaos al país –cifra mui similar a la del 2008–,  de los que 809 se destinaron a infraestructures. Dende esi momentu, añu a añu, cola esceición única del 2015, foron de descensu continuu hasta llegar a los 211,25 millones d’euros qu’afiten los Presupuestos Xenerales del Estáu del 2017 que ta negociando’l Partido Popular (PP): 807,75 millones menos en 8 años.

Asturies ye’l quintu territoriu que ve más reducida l’aportación del Estáu, namái superáu por Andalucía (36,46 por cientu), Comunitat Valenciana (32,98), Galicia (32,20) y Castilla y Lleón (31,67). Los dos únicos llugares onde aumenta la inversión estatal ye en Canarias (3,23 por cientu) y Melilla (15,62).

Como únicu datu positivu, el desembolsu per cápita sigue siendo mayor que la media estatal (184,66 euros), asitiándose en 202,62 euros. Castilla y Lleón, con 405,15 euros por habitante encabeza esta llista, ensin tener en cuenta a les ciudaes autónomes.

Descontentu xeneralizáu

Toles formaciones polítiques, inclusive Foro, amosaron el so descontentu poles cuentes del PP p’Asturies. Dende’l Gobiernu calificóse la inversión de “despropósitu” y apuntóse qu’estes cuenten lleven al país a niveles del sieglu pasáu.

Pela so parte, Isidro Martínez Oblanca, diputáu de Foro nel Congresu, alvirtió al PP que nun pue dar por aseguráu’l so votu favoratible a los Presupuestos Xenerales del Estáu al nun ver reflexaes nes cuentes les partíes reclamaes pol so partíu, que foi en coalición eleutoral colos populares. El xixonés apunta que nun dexen nidio la llegada de la velocidá alta al país.

Na semeya, el ministru de Facienda y Función Pública, Cristóbal Montoro, entrega a Ana Pastor, presidenta del Congresu, los Presupuestos Xenerales del Estáu pal 2017.

Contador Estadistiques