Podemos recibe documentación sobre posibles irregularidaes tamién en Radioterapia

|

Al ‘Uroleaks’, yá en manes de la Fiscalía, podríen sumase próximamente irregularidaes nueves, nesti casu en Radioterapia del HUCA. Podemos recibió della documentación al respeuto, que ta anguaño estudiando al tiempu que critica la posición de Del Busto por “cargar contra’l qu’alza la voz y asoleya les inxusticies”.

La Fiscalía abrió recién dilixencies, tres la denuncia pública fecha por Podemos, tanto pola información que manexaba la formación morada de que dos altos cargos políticos entovía n’activu tuvieron tratos de favor n’Uroloxía del HUCA al saltase la llista d’espera, lo que se vieno a llamar ‘Uroleaks’, como pol orixe d’esa información. “Trátase d’una actuación impecable, necesaria y garantista por parte de la Fiscalía y vamos collaborar pa facilita-y tola información que solicite”, afirma’l diputáu Andrés Fernández Vilanova ‘Ron’ que, por contra, califica de “vergoña” l’actitú de la Conseyería de Sanidá.

Nesi sen, el parllamentariu pol occidente llamenta que'l conseyeru Francisco Del Busto “en llugar d’ayudar a esclariar los fechos, interponga una acusación vaga y absurda pa cargar contra’l qu’alza la voz y asoleya les inxusticies”. Ron entiende qu’esa postura “tien una nidia intención evasiva y represiva, que paez querer encubrir a los políticos implicaos, desviar l’atención, desprestixar el trabayu parllamentariu y al tratar d’evitar que pueda haber filtraciones nueves nos centros sanitarios”.

Sicasí, el diputáu celebra que tenga “l’efeutu contrariu” y anuncia que’l martes “recibimos más información sobre posible irregularidaes n’otros servicios, como ye’l casu de Radioterapia del HUCA, que tamos analizando y que va conocese nes selmanes próximes”. Por último, consideró esperanzador que la Fiscalía atendiera l’escritu y “se decidiera a investigar lo que les autoridades sanitarias refuguen esclariar, pese a tener nes sos manes tolos recursos necesarios”.

Axuntamos les declaraciones d'Andrés Ron:

Contador Estadistiques