“La Conseyería y el SESPA deben asumir la so responsabilidá y verificar los indicios aportaos”, esixe Podemos pol ‘Uroleaks’

L’anuncia fecha por Podemos de que dos altos responsables políticos tuvieron tratu de favor n’Uroloxía sigue trayendo cola. Considera que'l conseyeru Del Busto cometió un error desvelando más información de la dada por Ron y que Sanidá y el SESPA “deben asumir la so responsabilidá y verificar los indicios aportaos”.

“Francisco del Busto argumentó que por contener datos personales de pacientes, nun yera competencia de so l’estudialos, lo qu’en sí ye bastante discutible. P’analizar cualquier irregularidá na xestión de pacientes en llistes d’espera, ye necesario contrastar historias clíniques. Al negar esta competencia, taría negando la capacidá auditora del SESPA pa velar pol correutu funcionamientu de los servicios, y reconoz de forma implícita que nun esiste nengún control que pueda evitar irregularidaes y tratos de favor nes llistes d’espera de la Sanidá asturiana”, argumenten dende Podemos, formación qu’opina “que se trata d’un simple pretestu, d’una maniobra de distraición, pa evitar investigar un casu que pon interrogantes na supervisión xestora y política d’un serviciu inmersu en presuntes irregularidaes y caos organizativu”.

Sicasí, ésti nun foi l’únicu error del conseyeru de Sanidá, “que reveló muncha más información de la que realmente se contenía na documentación unviada por Podemos”. Asina, indica que’l políticu foi “l’únicu que reveló datos personales concretos, al falar de ‘pacientes con tumores renales’, cuestión nun se mencionaba nos archivos que recibió nel so corréu electrónicu, onde en nengún casu figuraben diagnósticos, sólo feches d’intervenciones y epígrafes xenéricos de cursos clínicos”.

Dos situaciones

Por ello, Podemos entiende que sólo pueden dase dos situaciones. La primera ye que “taba al corriente del casu” y, la segunda, que “comprobó les historias clíniques, faciendo precisamente lo contrario de lo qu’afirmó na rueda de prensa” del miércoles. “Dambes opciones dexaríenlu nuna controvertida situación, que preferimos nun valorar”, añaden nun comunicáu pol yá nomáu 'Uroleaks'.

El fechu de que Del Busto anunciara que llevaría la información a la Fiscalía ye, pa Podemos, un reconocimiento de que “efeutivamente esiste irregularidá”, polo qu’esixe al conseyeru y al SESPA que verifiquen los indicios aportaos, porque, de lo contrario, “taríen dificultando l’esclaramientu de los fechos, y demostrando la so falta de voluntá pa resolver les irregularidaes que ponen en compromisu’l nuesu sistema sanitariu”.