Podemos lleva al Plenu del vienres la so proposición pa retirar l’IBI a los horros, paneres y cabazos

La sesión plenaria de la Xunta Xeneral d’esti vienres va tratar una proposición non de llei presentada por Podemos pa retirar l’IBI a los horros y paneres y activar partíes específiques pa la so conservación. Dellos espertos ratificaron esti llunes en Candás la tesis que defende la formación morada.

La diputada Lucía Montejo y el direutor del Muséu del Pueblu d’Asturies, Juaco López, xunto con artesanos, constructores y investigadores, amás de Víctor Manuel Suárez, promotor de la campaña de Change.org entitulada ‘Preservar los hórreos y paneras de Asturias’, que suma 3.882 apoyos, participaron nesti alcuentru entamáu por Podemos Asturies cola fin d’analizar la situación actual del patrimoniu etnográficu en xeneral y de los horros y paneres, en particular, asina como pa proponer midíes y soluciones a la situación grave de riesgu nel que tán estos edificios. Asina, los presentes coincidieron na potencialidá d’estos elementos nel ámbitu educativu, del emplegu y del turismu, asina como na necesidá d’acometer midíes urxentes pa frenar el deterioru aceleráu, cuando non la so perda.

Nesi sen, la idea xeneral ye la necesidá d’eliminar l’Impuestu sobre Bienes Inmuebles (IBI) al conxunto d’horros, paneres y cabazos. Montejo calificó de “escandaloso” el fechu de qu’estos bienes muebles paguen l’IBI porque esti impuestu “como’l so propiu nome indica, sólo debería aplicase a inmuebles", mientres hai elementos arquiteutónicos ensin interés patrimonial “exentos col criteriu únicu de quién ye’l so propietariu”.

La parllamentaria criticó al Gobiernu de Javier Fernández al considerar qu’ésti amuesa “una falta de sensibilidá y compromisu absoluta” con Asturies al permitir qu’elementos del patrimoniu cultural del país “caigan lliteralmente”.