Podemos esixe la retirada del IBI a horros y paneres pa defender esti patrimoniu etnográficu

La “perda acelerada d’una gran parte del patrimoniu etnográficu asturianu” lleva a Podemos a esixir la retirada del Impuestu sobre Bienes Inmuebles (IBI) a elementos como horros, paneres y cabazos p’ayudar a la so proteición. La organización morada califica la política cultural del Gobiernu de “nefasta”.

“Pese a l’alta estima social y al so nidiu interés cultural, el patrimoniu etnográficu asturianu ta anguaño nuna grave situación de conservación que ye urxente reconducir”, apunten dende Podemos, que critica la penalización de la propiedá d’estos edificios “con un impuestu inxusto que vien a afondar na problemática: los horros y paneres son l’único bien mueble graváu con un impuestu que debería afeutar, como’l so propiu nome indica, a los inmuebles”. A esta situación súmase “que nun esiste nengún tipu de planificación por parte de l’Alministración nel establecimientu de prioridaes basaes na importancia de los elementos, bien pola so singularidá o pola so representatividá territorial”.

La fraxilidá d’estes construcciones xenera pa Podemos “una situación dramática, cola perda acelerada d’una gran parte del patrimoniu etnográficu asturianu, mientres l’Alministración socialista asturiana permanez impasible y, una vegada más amuesa la so falta de sensibilidá con Asturies”. Por ello esixe “la retirada inmediata del IBI a horros y paneres, asina como a la ellaboración urxente d’una estratexa pa la conservación del patrimoniu etnográficu asturianu que marque les prioridaes, medios humanos y económicos disponibles y mecanismos d’intervención nel conxuntu del patrimoniu etnográficu asturianu de caráuter material y inmaterial, asina como l’establecimientu d’una llinia presupuestaria encaminada a garantizar la conservación d’aquellos bienes más singulares o representativos”.