Piñán respuende con normalidá n’asturianu toles entrugues recibíes na Xunta Xeneral

Izquierda Xunida (IX), Foro y PP entrugaron en castellanu a Berta Piñán esti martes na Xunta Xeneral y la conseyera respondió-yos con normalidá n’asturianu, al igual qu’a Podemos, que nesti casu preguntó en llingua asturiana. Los dos diputaos de VOX abandonaron el Plenu nel momentu de la intervención de Rafael Palacios.

Na primer sesión tres l’alcuerdu ente la Federación Socialista Asturiana (FSA-PSOE) y Asturies pela Izquierda (IX-IAS) na Mesa de la Cámara nengún diputáu dixo nun entender nenguna de les intervenciones que se sintieron n’asturianu. Piñán respondió nesta llingua a les entrugues al Conseyu de Gobiernu correspondientes a Cultura, Política Llingüística y Turismu plantegaes en castellanu y Ángela Vallina, Adrián Pumares y el popular José Manuel Felgueres tuvieron un alderique con normalidá nos dos idiomes cola conseyera.

Namái VOX sigue empeñáu en torgar l’usu de la llingua asturiana y del gallego-asturiano. La puesta n’escena d’esta mañana foi abandonar el Plenu “en refugu al alcuerdu ente’l PSOE y IX sobre l’usu del bable”.

Foi nel momentu de la intervención de Podemos por nun recibir una traducción de la entruga plantegada por Palacios. Hasta esi instante Ignacio Blanco o Sara Concepción Álvarez Rouco, al menos ún de los dos, tuvieron presentes nes respuestes n’asturianu de Piñán y nun alegaron incomprensión nenguna.

Una vegada fuera, la formación anunció la so intención de redautar “un protocolu propiu” y de valorar “actuaciones xudiciales”. Álvarez Rouco tornaría al hemiciclu pa la siguiente entruga prevista nel orde del día del Plenu.

Na imaxe, los escaños de VOX –asitiaos na última filera– vacíos mentes Piñán respuende a Palacios.